MTTLARDA FAOLIYaT YuRITAYoTGAN PEDAGOGLARNI YaNGI DASTUR BILAN IShLAShGA OʻRGATISh BOʻYIChA SEMINAR-OʻQUV MAShGʻULOTLARI OLIB BORILMOQDA

Bolaning bilim, malaka va qadriyatlari hayotiy vaziyatlarda kattalar va tengdoshlari bilan muloqotda axloq qoidalari va meʼyorlariga rioya qilgan holda oʻzini tutish mahorati orqali rivojlanib boradi. Bunda maktabgacha taʼlim tashkilotlarida amalga oshiriladigan taʼlimiy va tarbiyaviy dasturlarning ahamiyati katta. Ayniqsa, 6-7 yoshdagi bolaning muloqot vositalaridan turli vaziyatlarda foydalanish koʻnikmasini shakllantirib borishda turli oʻyin-mashgʻulotlari, samimiy muloqot qilish usullari, atrof muhitni ongli ravishda idrok qilish va uni amalda qoʻllash   koʻnikmalari, shuningdek, jismoniy, ijtimoiy-hissiy, nutq, muloqot, oʻqish, yozish malakalari, oʻz yoshiga mutanosib ravishda sogʻlom turmush tarzi  meʼyorlariga moslashishi uni oʻz harakatlarini  hissiyot va sezgi organlari  yordamida boshqarishga, shaxsiy gigiyena qoidalariga amal qilishga oʻrgatadi.  Shu jihatdan olib qaraganda maktabgacha taʼlim tashkiloti pedagoglari oʻz bilim va malakalarini doimiy ravishda oshirib borishlari, bola dunyoqarashini bogʻcha yoshidanoq toʻgʻri shakllantirishda innovatsion  usullarni qoʻllash malakasiga ega boʻlishlari  zarur. Bu borada Amudaryo tuman Maktabgacha va maktab taʼlimi boʻlimi tomonidan tizimli ishlar amalga oshirilmoqda.

Xususan, Oʻzbekiston Respublikasi maktabgacha va maktab taʼlimi vazirligining 2025-yil 17-iyundagi "Maktabgacha taʼlim tashkilotlarida faoliyat yuritayotgan pedagoglarni yangi dastur bilan ishlashga oʻrgatish boʻyicha qisqa muddatli  oʻquv qursi tashkil etish haqida" gi 200-sonli buyrugʻiga asosan maktabgacha taʼlim tashkilotlarida pedagog kadrlarni yangi dasturlar bilan ishlashga oʻrgatish boʻyicha iyun-avgust oylarida kaskad usulida qisqa muddatli seminar-oʻquv kursi  tashkil etilib, mazkur oʻquv kursi orqali MTTlarda faoliyat olib boruvchi tarbiyachi-pedagoglarni  yangi dastur boʻyicha oʻqitish ishlari olib borilmoqda.

Mazkur oʻquv seminar-oʻquv kursining 1-bosqich mashgʻulotlari joriy yilning 24-26-iyun kunlari Maktabgacha taʼlim tashkilotlari direktor va mutaxassislarini qayta tayyorlash va ularning malakasini oshirish instituti (Maktabgacha taʼlim instituti) professor-oʻqituvchilari tomonidan amalga oshirilib, ushbu mashgʻulotlarda master-trenerlar oʻqitildi. 30-iyun-2-iyul kunlari boʻlib oʻtgan oʻquv kursining 2-bosqich mashgʻulotlari Maktabgacha taʼlim instituti, Qoraqalpogʻiston Respublikasi va viloyatlar pedagogik mahorat markazlarida oʻtkazildi va unda master-trenerlar tomonidan trener-mentorlar oʻqitildi.

Ayni paytda oʻquv kursining 3-bosqich mashgʻulotlari muvaffaqiyatli tarzda olib borilmoqda. Oʻquv rejasiga koʻra, 4-8-iyul kunlarida oʻtkazilayotgan mazkur mashgʻulotlar tayanch maktabgacha taʼlim tashkilotlarida trener-mentorlar tomonidan davlat maktabgacha taʼlim tashkilotlarining direktor oʻrinbosarlari (direktorlari)ning malakalari oshirilmoqda.

Joriy yilning 9-iyul – 29-avgust kunlarida  davlat maktabgacha taʼlim tashkilotlarida  oʻtkaziladigan oʻquv mashgʻulotlarida MTT direktor oʻrinbosarlari (direktorlar) tomonidan tarbiyachi-pedagoglar oʻqitiladi.

Amudaryo tumani MMTBga qarashli 5-sonli tayanch davlat maktabgacha taʼlim tashkilotida 4-8-iyul kunlari uchun belgilangan oʻquv-rejasi asosida  trener-mentor Gulchehra Yuldasheva tomonidan davlat maktabgacha taʼlim tashkilotlarining direktor oʻrinbosarlari  va direktorlarini oʻqitish ishlari  qiziqarli savol-javoblar, innovatsion  uslublar asosida   olib borilmoqda.

Mashgʻulotlar jarayonida oʻquv kursi ishtirokchilariga trener-mentor Gulchehra Yuldasheva zamonaviy taʼlim dasturlariga  kirishda Singapur trener-taʼlim modelini tavsiya qilish orqali bolaning intellektual rivojlanishida muhim ahamiyatga ega boʻlgan  kompetentsiyalar, jumladan, muloqot vositalaridan turli vaziyatlarda foydalanish koʻnikmasi, oʻyin va oʻyindan tashqarida tajriba va bilim koʻnikmalaridan  ijtimoiy foydalanish, bolaning axloqiy mahorati, atrof olamni ongli ravishda idrok etish va uni amalda qoʻllash, ijtimoiy-hissiy, nutq, muloqot, oʻqish, yozish  koʻnikmalari, bilish jarayonining ijodiy rivojlanishi yuzasidan  qiziqarli va hayotiy  tajribalar majmuini taqdim etdi.

Darvoqe, zamonaviy taʼlim dasturlariga koʻra, Singapur taʼlim modeli PISA kabi xalqaro baholash tizimlarida yuqori oʻrinlarda turadi. Dasturning natijaviyligi shundaki, mantiqiy va mustaqil fikrlashga, muammoli vaziyatlarni hal qilishga urgʻu beradi. Ayniqsa, Marshal   Cavendish Edusation (MCE) dasturlari zamonaviy taʼlim yondashuvlarini oʻrganishga bagʻishlangan. Xalqaro standartlarga asoslangan dasturlarning mohiyati va ularni mahalliy taʼlim tizimiga integratsiya qilish yoʻllarini koʻrib chiqish bugungi kunning dolzarb vazifasidir.

Trener-mentor  Gulchehra Yuldasheva seminar-oʻquv kursi  mashgʻulotlarida  maktabgacha taʼlim tashkilotlari direktor oʻrinbosarlarini STEM dasturi, Kinder Thinkers,  Bigeye Tots, Primary Mathematiks Grade K  dasturlari va eng   zamonaviy taʼlim dasturlari bilan mufassal tanishtirib, ushbu taʼlim dasturlarini amaliyotga joriy etish  boʻyicha zarur tushuncha va tavsiyalar berib  bormoqda.

Seminar-oʻquv kursi mashgʻulotlari muvaffaqiyatli tarzda davom etmoqda va unda tuman Maktabgacha va maktab taʼlimi boʻlimi tasarrufidagi MTTlar, nodavlat  hamda davlat xususiy sheriklik asosida faoliyat olib boruvchi  muassasalarning direktorlari, direktor oʻrinbosarlari va tarbiyachi-pedagoglari zamonaviy taʼlim dasturlarini amaliyotga joriy etish boʻyicha oʻz bilim va malakalarini oshirmoqdalar.                                                                                                   

ROBIYa YOʻLDOShEVA.