ИЛҒОР ТОМОРҚАЧИНИНГ ИБРАТЛИ ТАШАББУСИ ВА ТАЖРИБАСИ

Мамлакатимизда сўнгги йилларда томорқа хўжалигини ривожлантириш, илғор томорқа ер эгаларининг иш тажрибаларини оммалаштиришга қаратилган чора-тадбирлар туфайли бугунги кунда томорқа нафақат мўл-кўл даромад манбаи, балки зироатчилик бўйича ҳақиқий тажриба майдонига айланиб бормоқда. Қишлоқ хўжалиги соҳасига доир янгиликлар ва тажрибаларни ўз фаолиятига татбиқ этиб, томорқа хўжалигини том маънода зироатчилик фабрикасига айлантирган, қишлоқда деҳқончилик маданиятини юқори даражага кўтарган, ўзларининг янги-янги ташаббуслари билан мамлакатимиз озиқ-овқат хавфсизлигини таъминлашга муносиб ҳисса қўшаётган томорқа ер эгалари талайгина.

Амударё туманининг Холимбег қишлоғида истиқомат қилувчи илғор томорқачи Эркин оға Қўшаев ана шундай фидойи деҳқонлардан. Уни бугунги кунда нафақат Амударё туманида, балки Қорақалпоғистон Республикаси ва Хоразм вилоятининг аксарият туманларида жуда яхши билишади. Чунки Эркин оға Қўшаев томорқа хўжалигида мавсумий экинлардан, мевазор боғи, узум токларидан сифатли ва юқори ҳосил олишдан ташқари, мевали дарахтлар, полиз ва сабзавот экинларининг табиий иқлим шароитига мос навларини яратиш орқали томорқа хўжалиги имкониятларини ўз меҳнати билан амалда намоён этиб, кафтдек ердан зар ундираётганлардан.

Эркин оға Қўшаев учун жорий йилги деҳқончилик мавсуми жуда баракали бўлди. Унинг шахсий ташаббуси билан Амударё туманида илк бор картошка уруғчилиги амалиёти бошланди. Мамлакатимизда йўлга қўйилган, маҳаллий иқлимга мос, сифатли уруғчилик маҳсулотлари етиштириш тизимига муносиб ҳисса қўшиш мақсадида у эрта баҳорда томорқа ерининг 10 сотих қисмига 300 килограмм "Тошкент" навли уруғлик картошка экди. Ўз вақтида амалга оширилган агротехник чора-тадбирлар туфайли экилган уруғ тўлиқ униб чиқди ва 3,4 тонна ҳосил олинди.

– “Тошкент" нави бизнинг тез ўзгарувчан табиий иқлим шароитимизга жуда мос, — дейди Эркин оға Қўшаев. — Серҳосил, касалликларга чидамли, тўйимлилик даражаси юқори, витаминларга бой. Уни туманимизнинг барча ҳудудларидаги томорқа ерларига, ҳатто фермер хўжаликларининг катта-катта майдонларига ҳам экиш мумкин.

Картошкачиликда "Амударё тажрибаси" сифатида эътироф этилаётган, илғор томорқачи Эркин Қўшаев ташаббуси билан томорқада амалга оширилган картошка уруғчилиги бўйича тажриба томорқадан самарали фойдаланиш ва қисқа муддатда юқори ҳосил олиш мумкинлигини исботлади ва амударёлик томорқачиларда катта қизиқиш уйғотиб, маҳаллий даражадаги янги йўналишни бошлаб берди.

Айни пайтда туманда соҳа мутахассислари томонидан махсус чора-тадбирлар режаси ишлаб чиқилиб, келгуси деҳқончилик йилидан бошлаб туманнинг барча ҳудудларидаги фермер хўжаликлари ва томорқа ер эгаларига ушбу тажрибани амалиётга татбиқ этиш кўзда тутилган. Шунингдек, холимбеглик илғор томорқачи Эркин оға Қўшаев томорқасида амалга оширилган картошка уруғчилигига оид ушбу тажрибанинг Республика миқёсидаги аҳамияти мутахассислар томонидан алоҳида эътироф этилиб, "Амударё тажрибаси"ни Қорақалпоғистон Республикасининг бошқа ҳудудларида ҳам татбиқ этиш режалаштирилмоқда.

"Тошкент" навли картошка етиштиришдаги иқтисодий ва агротехник устунликлар, хусусан, картошканинг серҳосиллиги, касалликларга ва Қорақалпоғистоннинг табиий иқлим шароитига мосланувчанлиги, тезпишарлиги деҳқонларга жуда манзур бўлмоқда ва мазкур йўналишда инфратузилма, тадқиқотлар ҳамда халқаро тажрибалар уйғунлигида иш олиб борилмоқда. Холимбеглик илғор томорқачи Эркин оға Қўшаев эса келгуси деҳқончилик мавсумида "Тошкент" навли картошка уруғчилиги йўналишида ҳам баҳорги, ҳам кузги мавсумларда картошка етиштиришни режалаштирган.

РОБИЯ ЙЎЛДОШЕВА.