Янги ташаббус — сердаромад соҳа сари дадил қадам

Бугунги кунда юртимизда қишлоқ хўжалиги соҳаси нафақат иқтисодий ривожланиш, балки халқимизнинг фаровон ҳаётини таъминлашда ҳам беқиёс аҳамият касб этмоқда. Президентимиз ташаббуси билан соҳада кенг кўламли ислоҳотлар амалга оширилаётгани, тадбиркор ва фермерларга яратилаётган имтиёзлар, субсидиялар ва қўллаб-қувватлаш механизмлари натижасида кўплаб янги йўналишлар ривож топмоқда.

Ушбу имкониятлардан унумли фойдаланган ҳолда самара фаолият юритаётган фидойи ва ташаббускор инсонлардан бири Амударё туманининг олис Беш овул маҳалласидаги “Дўсчанов Раҳимбой” фермер хўжалиги раиси Алишер Дўсчановдир. У ўз меҳнати ва шижоати билан нафақат хўжалигини кенгайтирмоқда, балки маҳаллий бозорни сифатли маҳсулотлар билан таъминлашга ҳам муносиб ҳисса қўшмоқда.

Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев тавсияси билан Алишер Дўсчанов ўз фаолиятини паррандачиликнинг истиқболли йўналиши бўлган ўрдак етиштириш билан янада кенгайтирди.

У дастлаб Хоразм вилоятидан 500 дона ўрдак олиб келиб, улар учун махсус шароитлар яратди. Ҳаракат ва меҳнат эвазига бугун ушбу ўрдаклар дастлабки нархидан уч баробар юқори қийматда баҳоланмоқда. Бу эса ўрдакчиликнинг сердаромад соҳага айланиши мумкинлигини яққол кўрсатмоқда.

Фермернинг айтишича, ўрдак етиштириш нафақат фойдали, балки истиқболли соҳа. Келгусида бу ишни янада кенгайтириб, кўплаб янги иш ўринлари яратиш ниятида аниқ режалар тузилмоқда.

Фермер Алишер Дўсчановнинг янги ташаббуслари фақат паррандачилик билан чегараланиб қолмади. У Президентимиз томонидан яратилаётган кенг имкониятлардан самарали фойдаланиб, имтиёзли кредит асосида чорвачилик хўжалигини ташкил этиш режаларини ҳам ишлаб чиқмоқда.

Бугунги кунда тажрибали тадбиркор субсидиялар эвазига зарур техникаларни сотиб олиб, хўжаликнинг моддий-техник базасини мустаҳкамлади. Натижада, хўжалик фаолияти янги босқичга кўтарилиб, ривожланиш ва тараққиёт сари одимламоқда.

Шунингдек, фермер балиқчиликни ҳам ривожлантирмоқда. Хўжаликда йилига 7–8 тонна балиқ етиштирилиб, бундан ҳам қўшимча даромад олинмоқда. У билан суҳбат давомида балиқчиликнинг ҳам истиқболли соҳа ва барқарор даромад манбаи эканлигига амин бўлдик.

Алишер Дўсчановнинг бу ташаббуслари қишлоқ хўжалигида янги йўналишларни ривожлантириш, маҳаллий бозорни сифатли маҳсулотлар билан таъминлаш ва энг муҳими, аҳоли бандлигини оширишга хизмат қилаётгани билан янада аҳамиятли бўлмоқда.

Бугун қишлоқда биргина инсоннинг дадил ташаббуси бутун бир маҳалла ҳаётига ижобий таъсир кўрсатмоқда. Бу эса, албатта, муҳтарам Президентимиз олиб бораётган изчил ислоҳотлар натижасида яратилган кенг имкониятларнинг амалий самарасидир.

Хулоса ўрнида айтиш мумкинки, сердаромад тармоқларга дадил қадам қўяётган фидойи фермерларимизнинг меҳнати эртанги кунимиз фаровонлигини таъминлашда муҳим аҳамият касб этади. Алишер Дўсчановнинг ибратли ташаббуси эса қишлоқ хўжалигида янги ўсиш нуқталаридан бири сифатида намуна бўлади.

Чарос Арслонова, туман ҳокимлигининг Ахборот хизмати раҳбари.