ЎЗБЕКИСТОН ФЕРМЕРЛАРИ КЕНГАШИНИНГ БЎЛИМ БОШЛИҒИ АМУДАРЁДА ФЕРМЕР ХЎЖАЛИКЛАРИ ФАОЛИЯТИНИ ЎРГАНДИ

Мамлакатимизнинг барча ҳудудларидаги пахтачилик йўналишидаги фермер хўжаликларида кузги йиғим-терим ишлари авж паллага кирган. Пахта йиғим-теримида иштирок этаётган теримчиларга зарур шарт-шароитлар яратиш, пахта териш машиналарининг қувватларидан унумли фойдаланиш, шунингдек, фермер хўжаликларида энергия тежамкор технологиялари, томчилатиб суғориш агрегатларини ўрнатиш орқали иқтисодий тежамкорликка эришиш борасидаги ишлар Ўзбекистон Фермерлари Кенгаши томонидан доимий равишда мониторинг қилиб борилмоқда. Шу мақсадда Кенгашнинг бўлим бошлиғи Меҳриддин Муҳаммадиев Амударё туманида бўлиб, соҳада амалга оширилаётган ишлар билан яқиндан танишди.

Меҳриддин Муҳаммадиев тумандаги “Пирматов Баҳром”, “К-Ҳамид”,”Муродбек Зебо”, “Ситмамут”, “Ҳайтаков Улуғбек” фермер хўжаликларида бўлиб, далалардаги терим суръати, пахта терими жараёнида иштирок этаётган теримчиларга яратилган шарт-шароитларни ўрганди. Илғор теримчилар билан учрашиб, уларга Кенгаш томонидан тайёрланган совғаларни топширди.

Ўрганишлар жараёнида “Ситмамут”, “Ҳайтаков Улуғбек” фермер хўжаликлари раҳбарлари билан учрашиб, молиявий масалаларда, хусусан, турли жамғармалар ва субсидия маблағларидан мақсадли фойдаланиш юзасидан маслаҳатлар берди. Шу билан бирга, тумандаги фермер хўжаликларида жамғарма маблағларидан самарали фойдаланиш ҳолати ҳам ўрганилди.

Бундан ташқари, фермер хўжаликларида кредит маблағларидан мақсадли фойдаланиш, “яшил иқтисодиёт” тамойилига мувофиқ олиб борилаётган ишларга ҳам алоҳида эътибор қаратилди. Унга кўра, тумандаги “Муродбек Зебо” фермер хўжалиги томонидан 1 млрд. 303 млн сўм кредит маблағлари ҳисобидан 250 киловатт қувватга эга қуёш панеллари, “К-Хамид” фермер хўжалиги томонидан эса 268 млн. сўм кредит маблағлари ҳисобидан 70 киловатт қувватли қуёш панеллари ўрнатилиб, бугунги кунда фермер хўжалиги истеъмолидан ортганини тармоққа сотаётганлиги ижобий баҳоланди ва мазкур фермер хўжаликлари тажрибасини бутун туман бўйлаб кенг оммалаштириш зарурлиги таъкидланди.

Меҳриддин Муҳаммадиев бу борадаги ишларни янада яхшилаш, сув ўлчагич ускуналари ўрнатиш ва томчилатиб суғориш технологияларини жорий этиш истагида бўлган фермерлар рўйхатини шакллантириш бўйича Амударё туман Фермерлар Кенгаши раиси Илҳом Полвонов ва бошқа масъулларга зарур кўрсатмалар берди.

Шуни алоҳида эътироф этиш жоизки, Амударё туманидаги “Ҳайтаков Улуғбек” фермер хўжалиги томонидан "Амударё келажаги" ишлаб чиқариш кооперативи ташкил қилинган бўлиб, мазкур кооперативга ҳудуддаги 4 та фермер хўжаликлари аъзо бўлган ҳамда 2025 йил пахта ҳосилини ушбу кооперативга топширмоқда. Кооператив "Агро тарози" платформасига уланганлиги унга аъзо бўлган фермер хўжаликларидан пахта ҳосилини қабул қилишда шаффофликни таъминлаш имконини бермоқда.

Кооперативнинг илғор тажрибасини туман миқёсида оммалаштириш, шунингдек, далаларнинг четларига кўчат экиш, ариқларни бетонлаш, сув ўлчагичлар ўрнатиш, томчилатиб суғоришни ҳамда соҳага доир инновацион янгиликларни кенг жорий этиш юзасидан “Ҳайтаков Улуғбек” фермер хўжалиги ва “Амударё келажаги” ишлаб чиқариш кооперативи масъулларига қатор тавсиялар берилди.

Ўрганишлар жараёнида камчиликларга ҳам эътибор қаратилди. Хусусан, фермер хўжаликларида мавжуд насослардан фойдаланишда электр энергиясидан юзага келган қарздорликни бартараф қилиш бўйича тегишли масъулларга топшириқлар берилди. Пахта ва ғалла етиштиришда насосларга сарфланадиган электр энергияси тўловини субсидия ҳисобидан қоплаш тартиби ҳақида марказ ходимларига тушунтиришлар берилди.

Ўрганишлар натижаларига кўра Амударё туманидаги фермер хўжаликлари раҳбарларини тармоқдаги бир қатор муаммолар қийнаб келаётганлиги ҳам маълум бўлди ва уларни ҳал қилиш чоралари кўрилди.

Меҳриддин Муҳаммадиев фермер хўжаликлари раҳбарлари билан алоҳида суҳбатлашиш ва уларнинг фаолиятига доир ютуқ ва муаммоларини ўрганишлар жараёнида амударёлик фермерларга ўз фаолиятларини замон талаблари даражасида ташкиллаштириш, аграр тизимга доир янгилик ва ўзгаришларни соҳага кенг жорий этиш юзасидан зарур тавсиялар ва топшириқлар берди.

РОБИЯ ЙЎЛДОШЕВА.