OʻZBEKISTON FERMERLARI KENGAShINING BOʻLIM BOShLIGʻI AMUDARYoDA FERMER XOʻJALIKLARI FAOLIYaTINI OʻRGANDI

Mamlakatimizning barcha hududlaridagi paxtachilik yoʻnalishidagi fermer xoʻjaliklarida kuzgi yigʻim-terim ishlari avj pallaga kirgan. Paxta yigʻim-terimida ishtirok etayotgan terimchilarga zarur shart-sharoitlar yaratish, paxta terish mashinalarining quvvatlaridan unumli foydalanish, shuningdek, fermer xoʻjaliklarida energiya tejamkor texnologiyalari, tomchilatib sugʻorish agregatlarini oʻrnatish orqali iqtisodiy tejamkorlikka erishish borasidagi ishlar Oʻzbekiston Fermerlari Kengashi tomonidan doimiy ravishda monitoring qilib borilmoqda. Shu maqsadda Kengashning boʻlim boshligʻi Mehriddin Muhammadiyev Amudaryo tumanida boʻlib, sohada amalga oshirilayotgan ishlar bilan yaqindan tanishdi.

Mehriddin Muhammadiyev tumandagi “Pirmatov Bahrom”, “K-Hamid”,”Murodbek Zebo”, “Sitmamut”, “Haytakov Ulugʻbek” fermer xoʻjaliklarida boʻlib, dalalardagi terim surʼati, paxta terimi jarayonida ishtirok etayotgan terimchilarga yaratilgan shart-sharoitlarni oʻrgandi. Ilgʻor terimchilar bilan uchrashib, ularga Kengash tomonidan tayyorlangan sovgʻalarni topshirdi.

Oʻrganishlar jarayonida “Sitmamut”, “Haytakov Ulugʻbek” fermer xoʻjaliklari rahbarlari bilan uchrashib, moliyaviy masalalarda, xususan, turli jamgʻarmalar va subsidiya mablagʻlaridan maqsadli foydalanish yuzasidan maslahatlar berdi. Shu bilan birga, tumandagi fermer xoʻjaliklarida jamgʻarma mablagʻlaridan samarali foydalanish holati ham oʻrganildi.

Bundan tashqari, fermer xoʻjaliklarida kredit mablagʻlaridan maqsadli foydalanish, “yashil iqtisodiyot” tamoyiliga muvofiq olib borilayotgan ishlarga ham alohida eʼtibor qaratildi. Unga koʻra, tumandagi “Murodbek Zebo” fermer xoʻjaligi tomonidan 1 mlrd. 303 mln soʻm kredit mablagʻlari hisobidan 250 kilovatt quvvatga ega quyosh panellari, “K-Xamid” fermer xoʻjaligi tomonidan esa 268 mln. soʻm kredit mablagʻlari hisobidan 70 kilovatt quvvatli quyosh panellari oʻrnatilib, bugungi kunda fermer xoʻjaligi isteʼmolidan ortganini tarmoqqa sotayotganligi ijobiy baholandi va mazkur fermer xoʻjaliklari tajribasini butun tuman boʻylab keng ommalashtirish zarurligi taʼkidlandi.

Mehriddin Muhammadiyev bu boradagi ishlarni yanada yaxshilash, suv oʻlchagich uskunalari oʻrnatish va tomchilatib sugʻorish texnologiyalarini joriy etish istagida boʻlgan fermerlar roʻyxatini shakllantirish boʻyicha Amudaryo tuman Fermerlar Kengashi raisi Ilhom Polvonov va boshqa masʼullarga zarur koʻrsatmalar berdi.

Shuni alohida eʼtirof etish joizki, Amudaryo tumanidagi “Haytakov Ulugʻbek” fermer xoʻjaligi tomonidan "Amudaryo kelajagi" ishlab chiqarish kooperativi tashkil qilingan boʻlib, mazkur kooperativga hududdagi 4 ta fermer xoʻjaliklari aʼzo boʻlgan hamda 2025-yil paxta hosilini ushbu kooperativga topshirmoqda. Kooperativ "Agro tarozi" platformasiga ulanganligi unga aʼzo boʻlgan fermer xoʻjaliklaridan paxta hosilini qabul qilishda shaffoflikni taʼminlash imkonini bermoqda.

Kooperativning ilgʻor tajribasini tuman miqyosida ommalashtirish, shuningdek, dalalarning chetlariga koʻchat ekish, ariqlarni betonlash, suv oʻlchagichlar oʻrnatish, tomchilatib sugʻorishni hamda sohaga doir innovatsion yangiliklarni keng joriy etish yuzasidan “Haytakov Ulugʻbek” fermer xoʻjaligi va “Amudaryo kelajagi” ishlab chiqarish kooperativi masʼullariga qator tavsiyalar berildi.

Oʻrganishlar jarayonida kamchiliklarga ham eʼtibor qaratildi. Xususan, fermer xoʻjaliklarida mavjud nasoslardan foydalanishda elektr energiyasidan yuzaga kelgan qarzdorlikni bartaraf qilish boʻyicha tegishli masʼullarga topshiriqlar berildi. Paxta va gʻalla yetishtirishda nasoslarga sarflanadigan elektr energiyasi toʻlovini subsidiya hisobidan qoplash tartibi haqida markaz xodimlariga tushuntirishlar berildi.

Oʻrganishlar natijalariga koʻra Amudaryo tumanidagi fermer xoʻjaliklari rahbarlarini tarmoqdagi bir qator muammolar qiynab kelayotganligi ham maʼlum boʻldi va ularni hal qilish choralari koʻrildi.

Mehriddin Muhammadiyev fermer xoʻjaliklari rahbarlari bilan alohida suhbatlashish va ularning faoliyatiga doir yutuq va muammolarini oʻrganishlar jarayonida amudaryolik fermerlarga oʻz faoliyatlarini zamon talablari darajasida tashkillashtirish, agrar tizimga doir yangilik va oʻzgarishlarni sohaga keng joriy etish yuzasidan zarur tavsiyalar va topshiriqlar berdi.

ROBIYa YOʻLDOShEVA.