Истеъмолчилар ҳуқуқларини ҳимоя қилишда янги босқич
Мамлакатимизда бозор иқтисодиётини ривожлантириш билан бир қаторда, фуқароларнинг истеъмолчи сифатидаги ҳуқуқларини ҳимоя қилиш ҳам давлат сиёсатида устувор йўналишга айланмоқда. Бу борада сўнгги йилларда қатор ислоҳотлар амалга оширилди. Хусусан, Ўзбекистон Республикаси Президентининг 2025 йил 6 октябрдаги “Истеъмолчилар ҳуқуқларини самарали ҳимоя қилишни ташкил этиш чора-тадбирлари тўғрисида”ги ПҚ–296-сонли қарори ҳамда Вазирлар Маҳкамасининг 2025 йил 22 октябрдаги 667-сонли қарори соҳада янги босқични бошлаб берди.
Қарорларга мувофиқ, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда нодавлат нотижорат ташкилотлари ўртасида янгича ҳамкорлик тизими йўлга қўйилмоқда. Бу орқали жамоатчилик назоратини кучайтириш, аҳолининг ҳуқуқий хабардорлигини ошириш ва бозор муносабатларида шаффофликни таъминлаш кўзда тутилган.
Энг муҳим янгиликлардан бири — 2025 йил 1 декабрдан “Истеъмолчи мурожаати” ахборот тизимининг ишга туширилиши ҳисобланади. Бу тизим орқали истеъмолчиларнинг барча мурожаатлари ягона тарзда қайд этилади ва ҳар бир босқичда мониторинг қилиб борилади. Шунингдек, тадбиркорлар мурожаатларни аввал ўзи ҳал этиш имкониятига эга бўлади, муаммо ечилмаган тақдирда эса масала Қўмита ёки нодавлат тузилмалар томонидан кўриб чиқилади.
Бундан ташқари, тажриба тариқасида “сирли мижоз” ва назорат хариди тадбирлари жорий этилади. Бу усул орқали бозорда сотилаётган маҳсулот ва хизматлар сифати юзасидан ҳаққоний маълумотлар йиғилади. Нодавлат ташкилотлар бу тадбирларда давлат ижтимоий буюртмалари асосида иштирок этиб, ўз ходимларини махсус сертификат билан тайёрлайди.
Мазкур ислоҳотлар фуқароларнинг ҳуқуқий маданиятини ошириш, тадбиркорликда адолат ва ҳалол рақобатни таъминлаш йўлида муҳим қадам бўлиб хизмат қилади.
Шу ўринда фуқароларга мурожаат қиламизки, товар, иш ва хизматларга буюртма берганингизда истеъмолчи сифатидаги қонуний ҳуқуқларингиз бузилса, Ўзбекистон истеъмолчилар ҳуқуқларини ҳимоя қилиш жамиятлари Федерациясининг қисқа рақамли 1091 ишонч телефони ёки Телеграмдаги @PotrebitelUz_bot манзили орқали мурожаат қолдиришингиз мумкин.
Икром ХУДАЯРОВ, Амударё тумани истеъмолчилар ҳуқуқларини ҳимоя қилиш жамияти раиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
