Травматология ва ортопедияда янги ёндашувлар амалиётга жорий қилинмоқда

Республика миқёсида соҳа бўйича етакчи муассасалардан бири ҳисобланган Республика ихтисослаштирилган Травматология ва ортопедия илмий-амалий тиббиёт марказидан ташриф буюрган тажрибали травматолог-ортопед шифокор Ғуломжон Зуфаров Амударё тумани тиббиёт бирлашмасида бўлиб, шифохонада даволанаётган беморларни бевосита тиббий кўрикдан ўтказди ҳамда жойларда фаолият олиб бораётган даволовчи шифокорларга амалий ва услубий тавсиялар берди.

Ташриф доирасида шифокор Ғуломжон Зуфаров томонидан турли ёш тоифасидаги беморларнинг ҳолати атрофлича ўрганилиб, касалликларни эрта аниқлаш ва самарали даволашга қаратилган замонавий ёндашувлар муҳокама қилинди. Хусусан, болалар орасида учрайдиган 5 та турли ортопедик ва травматологик касаллик, шунингдек, катталарда кўп учрайдиган 3 та асосий касаллик — гонартроз, коксартроз ҳамда остеохондроз бўйича алоҳида тўхталиб ўтилди.

Мутахассис ушбу касалликлар бўйича ягона реестр юритишнинг аҳамиятига эътибор қаратиб, аҳоли орасида хавф гуруҳига кирувчи шахсларни барвақт аниқлаш мақсадида тизимли скрининг ишларини ташкил этиш зарурлигини таъкидлади. Айниқса, бу касалликларнинг илк босқичларида аниқланиши даволаш самарадорлигини ошириши, оғир асоратларнинг олдини олиши қайд этилди.

Шунингдек, туманда замонавий даволаш усулларини жорий этиш, инновацион тиббий технологиялардан фойдаланиш ҳамда профилактика ишларини кучайтириш масалалари юзасидан қатор аниқ таклиф ва тавсиялар берилди. Муҳокамалар давомида ушбу касалликларга қарши курашишда 12 турдаги даволаш усули ва 3 турдаги диагностика йўналишини туман тиббиёт муассасалари амалиётига босқичма-босқич жорий этиш имкониятлари атрофлича кўриб чиқилди.

Ташриф чоғида беморларни индивидуал тарзда кўрикдан ўтказишга алоҳида эътибор қаратилди. Ҳар бир беморнинг ҳолати, касаллик кечиши, олдин қўлланилган даво чоралари таҳлил қилиниб, кейинги даволаш режаси бўйича аниқ тавсиялар берилди. Бу эса беморлар учун самарали ва манзилли тиббий ёрдам кўрсатиш имконини яратди.

Бундан ташқари, замонавий кам жароҳат етказувчи операцияларни бажариш, яъни минимал инвазив усуллар орқали жарроҳлик амалиётларини ўтказиш бўйича ҳам маҳаллий шифокорларга амалий маслаҳатлар берилди. Бу усуллар беморларнинг тезроқ соғайиши, операциядан кейинги асоратларнинг камайиши ва реабилитация жараёнининг қисқаришига хизмат қилиши таъкидланди.

Умуман олганда, мазкур ташриф Амударё тумани тиббиёт бирлашмаси шифокорлари учун муҳим тажриба алмашинуви майдони бўлиб хизмат қилди. Берилган тавсиялар ва амалий кўрсатмалар жойларда ортопедия ва травматология йўналишида тиббий хизмат сифатини янада ошириш, аҳоли саломатлигини мустаҳкамлашга хизмат қилиши шубҳасиз.