ТАДБИРКОР – ЭЛГА МАДАДКОР

Мустақиллигимиз туфайли мамлакатимизда тадбиркорлик соҳасига кенг эътибор берилаётгани, шу туфайли юртдошларимизнинг хусусий мулкка эга бўлишаётгани умр бўйи ўқитувчилик касбини эъзозлаб, шу соҳада фидойи меҳнат қилиб келаётган таниқли муаллим Ражаб ака Давумовнинг ҳавасини келтирарди.

Турмуш ўртоғи билан уч ўғил ва бир қизни тарбиялаб вояга етказган Ражаб ака фарзандларига тадбиркорлик фаолияти билан шуғулланишларини маслаҳат қилди. Фарзандларига Манғит шаҳрида фаолият кўрсатаётган тадбиркорлар, уларнинг муваффақиятлари ҳақида гапириб берди. Шу тариқа Давумовлар оиласи тадбиркорлик сари дадил қадам ташлади.

2000 йилнинг октябрь ойида "Давум Ражаб” хусусий дўкони иш бошлади. Дўконда харидоргир молларнинг сотувга чиқарилгани, харидорлар билан яхши муомалада бўлишлик, энг асосийси улар ҳақига хиёнат қилмаслик "Давум Ражаб” хусусий дўконининг довруғини элга танитди.

Орадан йиллар ўтиб, Давумовлар оиласида амалга оширилаётган тадбиркорлик ишларини янада кенгайтириш эҳтиёжи сезилди.

Шу боисдан ҳам 2012 йилда "Давум Ражаб” савдо шохобчаси шу номдаги масъулияти чекланган жамиятга айланатирилиб, унинг қошида умумий овқатланиш шохобчаси ҳам ташкил этилди. Айни кунда ушбу масъулияти чекланган жамиятда 6 киши меҳнат қилади.

Биз "Давум Ражаб” МЧЖ раиси НуриддинДавумовдан ўз фаолияти ҳақида гапириб беришни илтимос қилганимизда у шундай деди:

- Биз фаолиятимиз давомида ходимларимизнинг ҳамиша ўз вазифаларига муносиб равишда иш юритишларини доимий равишда назорат қилиб борамиз. Озиқ-овқат маҳсулотлари билан савдо қилишимиз, таом тайёрлашимиз албатта биздан биринчи навбатда тозаликка эътибор беришимизни талаб қилади. Хўрандаларга хизмат кўрсатадиган ходимларнинг тоза юришлари, ўринларнинг, идиш-товоқларнинг тоза тутилиши албатта уларнинг яхши иштаҳа билан овқатланишларига ўз таъсирини кўрсатади.

Отамиз Ражаб Давумов биз – тадбиркор фарзандларига ҳамиша бир нарсани - харидорни ҳам, давлатимизни ҳам алдамасликни насиҳат қилади. Шу сабабдан ҳам биз отамиз ўгитларига амал қилган ҳолда харидорларга сидқидилдан хизмат қиламиз ва солиқ ҳамда бошқа мажбурий тўловларни ўз вақтида тўлашга, ҳисоботларимизни белгиланган муддатларда топширишга ҳаракат қиламиз.

Биз янги иш ўринларини яратишга ҳам алоҳида эътибор бермоқдамиз. Жорий йилда яна бир иш ўрин яратиб, коллеж битирувчисини ишга қабул қилдик.

Ражаб ака Давумовнинг яна бир фарзанди Фахриддин Давумов ҳам анча йиллардан буён тадибкорлик фаолияти билан шуғулланиб келади.

- ­­­­­­­­­­Мен ҳам укам Нуриддин каби савдо ва умумий овқатланиш шохобчаларига раҳбарлик қиламан. Шундай турдаги фаолиятларни амалга ошириш мақсадида ташкил этилган "Давумовлар” деб номланган масъулияти чекланган жамиятимизда 6 иши меҳнат қилади, - дейди биз билан суҳбатда Фахриддин Давумов. – Биз ўз фаолиятимизни олиб боришда ҳамиша отамиз Ражаб Давумовнинг маслаҳатларига амал қилиб келамиз. Мақсадимиз - халқимизга намунали хизмат кўрсатиб эл ишончини, ота-онамиз ишончини оқлаш.

Биз "Давум Ражаб” ва "Давумовлар” масъулияти чекланган жамиятлари фаолияти билан танишганимизда, ушбу жамиятлар раҳбарлари билан суҳбатлашган вақтимизда уларнинг Президентимиз Ислом Каримовнинг ва Ҳукуматимизнинг тадбиркорлик фаолиятини қўллаб-қувватлаш, уни янада ривожлантириш, улар фаолиятига халақит берадиган ғовларни олиб ташлаш борасидаги Фармон ва қарорларидан бениҳоя ҳурсанд эканликларини ҳис қилдик.

Тадбиркорларни эл мададкорлари дейишади. Биз бу гапнинг исботини Ражаб ака Давумовнинг тадбиркор фарзандлари каби эл юртимизга фидойи хизмат қилаётган кишилар мисолида кўриб турибмиз.