TADBIRKOR – ELGA MADADKOR

Mustaqilligimiz tufayli mamlakatimizda tadbirkorlik sohasiga keng eʼtibor berilayotgani, shu tufayli yurtdoshlarimizning xususiy mulkka ega boʻlishayotgani umr boʻyi oʻqituvchilik kasbini eʼzozlab, shu sohada fidoyi mehnat qilib kelayotgan taniqli muallim Rajab aka Davumovning havasini keltirardi.

Turmush oʻrtogʻi bilan uch oʻgʻil va bir qizni tarbiyalab voyaga yetkazgan Rajab aka farzandlariga tadbirkorlik faoliyati bilan shugʻullanishlarini maslahat qildi. Farzandlariga Mangʻit shahrida faoliyat koʻrsatayotgan tadbirkorlar, ularning muvaffaqiyatlari haqida gapirib berdi. Shu tariqa Davumovlar oilasi tadbirkorlik sari dadil qadam tashladi.

2000-yilning oktyabr oyida "Davum Rajab” xususiy doʻkoni ish boshladi. Doʻkonda xaridorgir mollarning sotuvga chiqarilgani, xaridorlar bilan yaxshi muomalada boʻlishlik, eng asosiysi ular haqiga xiyonat qilmaslik "Davum Rajab” xususiy doʻkonining dovrugʻini elga tanitdi.

Oradan yillar oʻtib, Davumovlar oilasida amalga oshirilayotgan tadbirkorlik ishlarini yanada kengaytirish ehtiyoji sezildi.

Shu boisdan ham 2012-yilda "Davum Rajab” savdo shoxobchasi shu nomdagi masʼuliyati cheklangan jamiyatga aylanatirilib, uning qoshida umumiy ovqatlanish shoxobchasi ham tashkil etildi. Ayni kunda ushbu masʼuliyati cheklangan jamiyatda 6 kishi mehnat qiladi.

Biz "Davum Rajab” MChJ raisi NuriddinDavumovdan oʻz faoliyati haqida gapirib berishni iltimos qilganimizda u shunday dedi:

- Biz faoliyatimiz davomida xodimlarimizning hamisha oʻz vazifalariga munosib ravishda ish yuritishlarini doimiy ravishda nazorat qilib boramiz. Oziq-ovqat mahsulotlari bilan savdo qilishimiz, taom tayyorlashimiz albatta bizdan birinchi navbatda tozalikka eʼtibor berishimizni talab qiladi. Xoʻrandalarga xizmat koʻrsatadigan xodimlarning toza yurishlari, oʻrinlarning, idish-tovoqlarning toza tutilishi albatta ularning yaxshi ishtaha bilan ovqatlanishlariga oʻz taʼsirini koʻrsatadi.

Otamiz Rajab Davumov biz – tadbirkor farzandlariga hamisha bir narsani - xaridorni ham, davlatimizni ham aldamaslikni nasihat qiladi. Shu sababdan ham biz otamiz oʻgitlariga amal qilgan holda xaridorlarga sidqidildan xizmat qilamiz va soliq hamda boshqa majburiy toʻlovlarni oʻz vaqtida toʻlashga, hisobotlarimizni belgilangan muddatlarda topshirishga harakat qilamiz.

Biz yangi ish oʻrinlarini yaratishga ham alohida eʼtibor bermoqdamiz. Joriy yilda yana bir ish oʻrin yaratib, kollej bitiruvchisini ishga qabul qildik.

Rajab aka Davumovning yana bir farzandi Faxriddin Davumov ham ancha yillardan buyon tadibkorlik faoliyati bilan shugʻullanib keladi.

- ­­­­­­­­­­Men ham ukam Nuriddin kabi savdo va umumiy ovqatlanish shoxobchalariga rahbarlik qilaman. Shunday turdagi faoliyatlarni amalga oshirish maqsadida tashkil etilgan "Davumovlar” deb nomlangan masʼuliyati cheklangan jamiyatimizda 6 ishi mehnat qiladi, - deydi biz bilan suhbatda Faxriddin Davumov. – Biz oʻz faoliyatimizni olib borishda hamisha otamiz Rajab Davumovning maslahatlariga amal qilib kelamiz. Maqsadimiz - xalqimizga namunali xizmat koʻrsatib el ishonchini, ota-onamiz ishonchini oqlash.

Biz "Davum Rajab” va "Davumovlar” masʼuliyati cheklangan jamiyatlari faoliyati bilan tanishganimizda, ushbu jamiyatlar rahbarlari bilan suhbatlashgan vaqtimizda ularning Prezidentimiz Islom Karimovning va Hukumatimizning tadbirkorlik faoliyatini qoʻllab-quvvatlash, uni yanada rivojlantirish, ular faoliyatiga xalaqit beradigan gʻovlarni olib tashlash borasidagi Farmon va qarorlaridan benihoya hursand ekanliklarini his qildik.

Tadbirkorlarni el madadkorlari deyishadi. Biz bu gapning isbotini Rajab aka Davumovning tadbirkor farzandlari kabi el yurtimizga fidoyi xizmat qilayotgan kishilar misolida koʻrib turibmiz.