ТАДБИРКОРЛИК ФАОЛИЯТИМИЗНИ ЯНАДА РИВОЖЛАНТИРАМИЗ

Менинг тадбиркор сифатида "Манғит-сифат-сервис” оилавий корхонамни ташкил қилганимга ҳали кўп вақт бўлгани йўқ. Шундай бўлишига қарамасдан корхонамизда аҳолига кўрсатадиган хизматимиз турлари тўрттага етди.

Айни кунда оилавий корхонамиз ҳисобида 3 нафар киши иш билан банд бўлиб, улардан бир нафари токарлик станогини бошқаради ва чилангарлик вазифасини бажаради, яна бир киши ун хоразни ишлатиш билан банд бўлса, яна бир киши эски пахталарни тозалаш станогини бошқаради.

Тадбиркорлик қоидаларига амал қилган ҳолда борига қаноат қилиб фаолият юритаётганлигимиз сабабли ишимизда юксак унум бўлаётир. Бу эса турмушимиз фаровонлигининг юксалишига омил бўлмоқда.

Муҳтарам Призентимиз И.Каримов томонидан жорий йилнинг 15 майида қабул қилинган "Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги Фармони бизнинг тадбиркорлик фаолиятимизни янада ривожлантиришга руҳлантирди. Чунки ушбу Фармон ва бу муҳим ҳужжат асосида қабул қилинган қонун ҳужжатларида белгиланган барча чора-тадбирлардан ягона мақсад – кичик бизнес ва хусусий тадбиркорлик ҳаракатини ривожлантириш орқали иқтисодиётимизнинг барқарорлигини таъминлаш, мулкдорлар синфини рағбатлантириш, натижада эса аҳоли турмуш даражаси ва сифатини оширишдан иборат.

Мен тадбиркор сифатида Президентимиз Фармони асосида қабул қилинган қонунда хусусий мулк, кичик бизнес ва хусусий тадбиркорнинг ҳуқуқий ҳимоясини янада кучайтириш, шунингдек, давлат, ҳуқуқни муҳофаза қилиш, назорат қилувчи органларнинг тадбиркорлик субъектлари фаолиятига ноқонуний аралашганлик учун кучли жавобгарлик белгиланганини юқори баҳолайман.

Биз тадбиркорлар эндиликда эркин фаолият юритиб, халқимизга кўрсатаётган хизматимиз сифатини янада яхшилашга, эл-юрт фаровонлиги йўлида астойдил меҳнат қилишга ҳаракат қиламиз.