TADBIRKORLIK FAOLIYaTIMIZNI YaNADA RIVOJLANTIRAMIZ

Mening tadbirkor sifatida "Mangʻit-sifat-servis” oilaviy korxonamni tashkil qilganimga hali koʻp vaqt boʻlgani yoʻq. Shunday boʻlishiga qaramasdan korxonamizda aholiga koʻrsatadigan xizmatimiz turlari toʻrttaga yetdi.

Ayni kunda oilaviy korxonamiz hisobida 3 nafar kishi ish bilan band boʻlib, ulardan bir nafari tokarlik stanogini boshqaradi va chilangarlik vazifasini bajaradi, yana bir kishi un xorazni ishlatish bilan band boʻlsa, yana bir kishi eski paxtalarni tozalash stanogini boshqaradi.

Tadbirkorlik qoidalariga amal qilgan holda boriga qanoat qilib faoliyat yuritayotganligimiz sababli ishimizda yuksak unum boʻlayotir. Bu esa turmushimiz farovonligining yuksalishiga omil boʻlmoqda.

Muhtaram Prizentimiz I.Karimov tomonidan joriy yilning 15-mayida qabul qilingan "Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari toʻgʻrisida”gi Farmoni bizning tadbirkorlik faoliyatimizni yanada rivojlantirishga ruhlantirdi. Chunki ushbu Farmon va bu muhim hujjat asosida qabul qilingan qonun hujjatlarida belgilangan barcha chora-tadbirlardan yagona maqsad – kichik biznes va xususiy tadbirkorlik harakatini rivojlantirish orqali iqtisodiyotimizning barqarorligini taʼminlash, mulkdorlar sinfini ragʻbatlantirish, natijada esa aholi turmush darajasi va sifatini oshirishdan iborat.

Men tadbirkor sifatida Prezidentimiz Farmoni asosida qabul qilingan qonunda xususiy mulk, kichik biznes va xususiy tadbirkorning huquqiy himoyasini yanada kuchaytirish, shuningdek, davlat, huquqni muhofaza qilish, nazorat qiluvchi organlarning tadbirkorlik subʼektlari faoliyatiga noqonuniy aralashganlik uchun kuchli javobgarlik belgilanganini yuqori baholayman.

Biz tadbirkorlar endilikda erkin faoliyat yuritib, xalqimizga koʻrsatayotgan xizmatimiz sifatini yanada yaxshilashga, el-yurt farovonligi yoʻlida astoydil mehnat qilishga harakat qilamiz.