Farovon mahallasi: Kambagʻallikni qisqartirish va tadbirkorlikni rivojlantirish yoʻlida amaliy ishlar qilinmoqda

Mamlakatimizda aholi bandligini taʼminlash, kambagʻallikni qisqartirish va tadbirkorlik tashabbuslarini qoʻllab-quvvatlash davlat siyosatining ustuvor yoʻnalishiga aylangan. Ushbu ezgu maqsadlarning amaldagi ijrosini Amudaryo tumanidagi Farovon mahallasi misolida yaqqol koʻrish mumkin. Bu yerda “Mahalla yettiligi”, xususan, hokim yordamchisi Muqaddas Beknazarova boshchiligida aholining daromad manbalarini kengaytirish boʻyicha tizimli va manzilli ishlar olib borilmoqda. Faqatgina qogʻozlardagi raqamlar emas, balki aholining real muammolarini ichidan oʻrganish va ularga amaliy koʻmak berish mahalladagi faoliyatning asosiy mezoni etib belgilangan. Bu borada ayniqsa yoshlar va xotin-qizlarni qoʻllab-quvvatlashga alohida urgʻu berilmoqda.

Joriy yilning oʻtgan 6 oyi davomida fuqarolarning murojaatlari, tadbirkorlik qilish istagi va ehtiyojlari chuqur tahlil qilinib, aniq manzilli chora-tadbirlar ishlab chiqildi. Oʻz biznesini boshlash istagida boʻlganlarga biznes-reja tuzish va hujjatlarni rasmiylashtirishda yaqindan yordam koʻrsatildi. Natijada 58 nafar fuqaroga imtiyozli kreditlar ajratilib, ularning barchasi soliq.uz elektron platformasi orqali rasmiy roʻyxatdan oʻtkazildi va doimiy bandligi taʼminlandi.

Aholi, ayniqsa yoshlar va xotin-qizlarga tikuvchilik, chorvachilik, issiqxona xoʻjaligi, savdo, parrandachilik va xizmat koʻrsatish kabi serdaromad sohalarni rivojlantirish boʻyicha kredit mablagʻlari ajratilib, koʻplab oilalarning moliyaviy barqarorligi taʼminlanmoqda. Shu bilan birga, bandlikni taʼminlash yoʻnalishida aholini, ayniqsa yoshlarni kasb-hunarga oʻqitishga ham jiddiy eʼtibor qaratilmoqda. Joriy yilning oʻtgan davri mobaynida 31 nafar fuqaro, jumladan, 5 nafar yoshlar turli kasb-hunar kurslarida oʻqitilib, maxsus sertifikatlarga ega boʻldi. Shuningdek, aholi orasida kooperatsiyaning afzalliklari va davlat subsidiyalari haqida keng qamrovli targʻibot ishlari olib borilmoqda.

Yaratilayotgan bunday shart-sharoitlar joylarda yangi biznes subʼektlarining paydo boʻlishiga mustahkam zamin yaratmoqda. Masalan, Farovon-3 koʻchasida istiqomat qiluvchi yosh tadbirkor Jahongir Rahimboyev davlat koʻmagidan unumli foydalanib, "JAHONGIR OLTINOY" masʼuliyati cheklangan jamiyatini davlat roʻyxatidan oʻtkazdi. Aholi ehtiyojidan kelib chiqib tashkil etilgan ushbu veterinariya dorixonasi bugungi kunda chorvadorlarga zarur dori vositalari va ozuqa qoʻshimchalarini uzluksiz yetkazib bermoqda. Kelgusida tadbirkor oʻz xizmat turlarini yanada kengaytirib, qoʻshimcha ish oʻrinlari yaratishni maqsad qilgan.

Xuddi shunday, mahallaning tashabbuskor yoshlaridan yana biri Yorqinoy Yerimbetova yakka tartibdagi tadbirkor sifatida oʻz tikuvchilik tsexini ochdi. Bugungi kunda samarali faoliyat yuritayotgan ushbu maskanda xotin-qizlar uchun milliy va zamonaviy liboslar, toʻy liboslari bichib-tikilmoqda. Yorqinoyning kelajakdagi rejalari katta boʻlib, u zamonaviy uskunalar xarid qilish orqali mahalladagi ishsiz ayollarni doimiy ish bilan taʼminlashni niyat qilgan.

Mahalladagi ijtimoiy himoyaga muhtoj qatlamni manzilli qoʻllab-quvvatlash tizimi ham eʼtiborga molik. Hududdagi jami 998 ta oila toʻliq xatlovdan oʻtkazilib, ularning 54 tasi ijtimoiy reyestrga kiritilgan. Shulardan 23 tasi davlat taʼminotidagi, 25 tasi kambagʻal va 6 tasi kambagʻallik chegarasidagi oilalardir.

Reyestrga kiritilgan barcha oilalarning sharoitidan kelib chiqqan holda individual dastur ishlab chiqilib, bugungi kunga qadar 35 nafar fuqaroning muammolari ijobiy hal etildi. Shuningdek, kambagʻal oilalar aʼzolarini moliyaviy qoʻllab-quvvatlash maqsadida 3 nafar fuqaroga asbob-uskuna xarid qilish uchun salkam 15 million soʻm miqdorida ssuda mablagʻlari ajratib berildi.

Olib borilgan mana shunday tizimli va keng qamrovli ishlar natijasida Farovon mahallasida kambagʻallik darajasi 2,5 foizga tushirilishiga erishildi. Bu koʻrsatkichlar shunchaki statistika emas, balki odamlarning hayotdan rozi boʻlib, ertangi kunga ishonch bilan intilayotganining amaldagi ifodasidir.

Hududda tadbirkorlikni rivojlantirish, yangi ish oʻrinlari yaratish va aholi farovonligini yuksaltirish borasidagi ishlar kelgusida ham uzluksiz davom ettiriladi.