УЛУҒ НАВОИЙ ДАҲОСИГА ЭҲТИPОМ КЎPСАТИЛДИ

Улуғ ҳазрат Мир Алишер Навоий даҳосига эҳтиром туркий халқлар маънавиятига, ўзбек халқининг илдизи теран, бой адабий меросига буюк ҳурмат ва эҳтиромдир. Зотан, халқимиз маънавиятини, мумтоз ва ҳозирги замон миллий адабиётимизни Алишер Навоийсиз тасаввур қилолмаймиз. Навоий нафақат ўз замонасининг, балки бугунги давр адабиётининг ҳам энг ёрқин сиймоси, миллий адабиётимиз ва маънавиятимиз фахридир. Шу боис улуғ адиб асарларига ҳар доим, ҳар куни мурожаат қиламиз, ўқиб-ўрганамиз, бу ўлмас битиклардан абадий мавзулар, мазмун ва моҳиятлар топамиз. Буюк бобокалонимиз асарларини мана, салкам олти асрга яқинлашдики, бутун дунё ҳавас ва ҳайрат билан ўқимоқда.

Туманимизнинг Қиличбой мавзесидаги 69-сонли умумтаълим мактабида “Pаҳмат сенга, қадрдон мактабим!” шиори остида хавфсизлик хизмати чегара қўшинлари таркибидаги 9202-ҳарбий қисмнинг Аёқчи чегара пости ҳарбий хизматчилари иштирокида адабий-бадиий учрашув ўтказилди. Учрашув тадбирида ўқувчи-ёшлар ва ҳарбийлар ўзларининг жонажон мактаб даргоҳида Алишер Навоий асарлари билан яқиндан танишганлари, Навоий шеърияти, Навоий ғазалиёти сеҳри билан мактаб партасида илк ошно бўлганларини фахрланиб сўзладилар.

Учрашув тадбирида 9202-ҳарбий қисм Аёқчи чегара пости бошлиғи ўринбсоари, лейтенант Миршод Ҳамроев, Аёқчи чегара пости бошлиғининг  тарбиявий ишлар бўйича ўринбосари Pашид Жанназаров, муддатли ҳарбий хизматчи, ҳаваскор шоир Ўринбосди Мирзаолимов ва Наимхон Мўминовлар Алишер Навоий асарларининг тарбиявий аҳамияти, ватанпарварликка ундовчи ғазаллари ҳамда ўзаро меҳр-оқибат, илм-маърифат тараннум этилган фалсафий фикрлари ҳақида ўқувчи-ёшлар билан дилдан суҳбатлашдилар.

Ҳарбийлар ўқувчиларга Навоийнинг мамлакат сиёсий ҳаётида фаол иштирок этганлигини, эгаллаган мансаби орқали мамлакатнинг маданий ва илмий тараққиётида катта ёрдам кўрсатганлигини, Ҳирот шаҳрида ва бошқа вилоятларда ўз ҳисобидан бир нечта мадраса, масжид, ҳаммом, кўприк ва бошқа иншоотларни қурдиргани ҳақида сўзлаб беришди. Ундан ташқари, юқори мансабга эга шахс бўла туриб, у мамлакат ҳаётининг ижтимоий-иқтисодий такомиллашишига катта ҳисса қўшганлиги, илм, фан, санъат ривожига ҳомийлик қилганлигини, элда тинчлик ва тотувлик ўрнатилишининг тарафдори бўлганлигини сўзлаб бердилар. Шунингдек, ўқувчилик давридан бошлаб, ҳозирга қадар унинг барча асарлари, ғазалларини севиб мутолаа қилишларини фахр билан ифода этдилар. Ўқувчи-ёшлар эса ўз навбатида Навоий достонларидан парчалар ўқиб, ғазал ва рубоийларини ифодали ёд айтиб бердилар.

Тадбир якунида ҳарбий қисм зобит ва аскарлари номидан ўқувчи-ёшларга 30 дона бадиий китоблар совға қилинди.
Тадбир якунида ўқувчи-ёшлар Аёқчи чегара пости ҳарбийларига миннатдорчилик билдирдилар.

Pобия ЙЎЛДОШЕВА.