ИЛҒОР ТЕРИМЧИЛАР РАҒБАТЛАНТИРИЛМОҚДА

Юртимизда жорий йилги пахта йиғим-терими мавсуми ҳам қизғин тарзда давом этмоқда. Пахта йиғим-теримида фермерларга яқиндан кўмаклашаётган теримчилар учун зарур шарт-шароитлар яратилган бўлиб, уларни рағбатлантириб боришга алоҳида эътибор қаратилмоқда. Пахта далаларида “оқ олтин”ни теришда энг юқори кўрсаткичга эришган илғор теримчилар аниқланиб, тегишли мутасаддилар, фермер хўжаликлари томонидан муносиб рағбатлантирилиб, қимматбаҳо совғалар топширилмоқда.

Туманимизда ҳам пахта йиғим-теримида фаол иштирок этаётган теримчиларни рағбатлантириш борасида қатор ишлар амалга оширилмоқда. Шу билан бирга масъуллар томонидан теримчилар учун яратилган шарт-шароитлар, терим ҳақларининг тўланиши, мажбурий меҳнатга жалб этмаслик кабилар ҳолати ўрганилиб, тегишли чоралар кўрилмоқда.

Ҳар йили пахта-терим мавсумида бўлгани каби бу йил ҳам туман Мудофаа ишлари бўлими бошлиғи бошчилигидаги бўлим шахсий таркиби ҳамда жорий йилги сафарбарлик резерви хизматига олинган фуқаролар тумандаги фермер хўжаликларида пахта йиғим-теримига кўмак беришмоқда. Далаларда теримчилар билан биргаликда терим суръатини ошириб, “оқ олтин” хирмонининг юксалишига ўз ҳиссаларини қўшишмоқда.

Туман Мудофаа ишлари бўлими бошлиғи Aзизбек Жанузаков ҳам Бегзод Камолов раҳбарлигидаги “Жайҳун-Чойкўл” фермер хўжалиги пахта далаларида меҳнат қилаётган теримчилар билан учрашиб, дилдан суҳбатлашди. Бўлим бошлиғи теримчилар билан юртимиздаги пахта йиғим-терими жараёни, теримчиларга пахта даласида яратилган шарт-шароитлар, уларга терим пулларининг ўз вақтида берилаётгани, муаммо ва камчиликлар хусусида суҳбатлашди. Шундан сўнг, уюшмаган аҳоли орасидан терим жараёнларида фаол иштирок этиб, бошқаларга намуна кўрсатаётган 6 нафар теримчиларга турли хилдаги озиқ-овқат маҳсулотларидан иборат совғалар улашилди.

Шу ўринда таъкидлаш керакки, мамлакатимизда бу йилги пахта йиғим-теримига алоҳида эътибор қаратилиб, бу борада Вазирлар Маҳкамасининг «2020 йил пахта ҳосилини йиғиб-териб олиш ишларини уюшқоқлик билан ташкил этиш чора-тадбирлари тўғрисида»ги қарори қабул қилинди. Қарор билан қўлда терилган ҳар бир килограмм пахта хомашёси учун биринчи теримда - 1 000 сўмдан, иккинчи теримда - 1 400 сўмдан кам бўлмаган миқдорда меҳнат ҳақи тўланиши белгилаб берилди.

Шунингдек, ушбу ҳужжатга кўра пахта териш машиналари билан териб олинган ҳар бир тонна пахта хомашёси учун 920 000 сўмдан кам бўлмаган хизмат ҳақи тўлаш белгиланиб, пахта хомашёси учун меҳнат ва хизмат ҳақи ҳар беш кунда, зарурат бўлганда, ҳар куни тўлаш тавсия этилди.

Қолаверса, ҳукумат қарорида кўрсатилганидек, ишсиз ҳамда вақтинчалик банд бўлмаган аҳолидан иборат терим отрядлари раҳбарлари билан мавсумий ишга қабул қилиш бўйича фуқаролик-ҳуқуқий шартномалар тузилиб, терим отрядлари раҳбарларига пахта хомашёси йиғим-терими якунига қадар 2 миллион сўмдан кам бўлмаган миқдорда меҳнат ҳақи тўланади. Ушбу харажатлар Бандлик ва меҳнат муносабатлари вазирлиги ҳузуридаги Жамоат ишлари жамғармаси маблағлари ҳисобидан қопланади.

Теримчиларга иш ҳақларини ўз вақтида бериш, уларни қўшимча рағбатлантириш меҳнат суръати ошишини таъминлайди. Совғаларга эга бўлган теримчилар ҳам ўзларига кўрсатилган  эътибордан жуда хурсанд бўлдилар ҳамда туман Мудофаа ишлари бўлими бошлиғига миннатдорчилик билдирдилар.

Чарос Арслонова, туман ҳокимлигининг Ахборот хизмати раҳбари.