ПАРРАНДА ГРИППИДАН САҚЛАНИНГ

Парранда гриппи – ўлимгарчилик хавфи жуда юқори бўлган ўта хавфли ва юқумли вирусли касалликдир. Ушбу касалликнинг вируси барча турдаги уй паррандаларида ҳамда сайроқи ва ёввойи қушларда касаллик келтириб чиқаради. Паррандалар ўртасида ҳаво-томчи, оғиз-нажас йўли орқали тарқалади. Касаллик одамдан одамга юқмайди лекин касал қушлардан, паррандаларнинг гўшти, қони, ички аъзоларидан ўтиши мумкин.
Ҳозирги кунда касалликнинг асосий манбаи сувда сузувчи ёввойи қушлар ҳисобланади. Касалликнинг аломатлари грипп ва ўткир респиратор касалликларга ўхшаб қайд қилинади.  Грипп касаллигидан фарқли равишда парранда гриппи билан оғриган одамларда томоқ оғриши, конъюктивит, бурун оқиши кузатилмайди. Уларда йўтал, нафас сиқиши, тана ҳароратининг 38 даражадан юқори бўлиши кузатилади. Ўз вақтида тиббий ёрдам берилмаса, беморлар ўртасида ўлимгарчилик 70 фоизгача бўлиши мумкин.

Касалликка чалинмаслик учун, аввало, уй паррандаларининг катакларини ёпиқ ҳолда сақлаш, яъни ёввойи қушлар билан мулоқотда бўлмаслигининг олдини олиш, улар орасида ўлимгарчилик ҳолатлари юз берганда ташлаб юбормасдан, тезда елим халтага солиб, маҳаллий ветеринария бўлими ходимларига  хабар бериш, хонадонларда товуқларга қараш учун бир одамни бириктириш ҳамда янгидан олинган товуқларни 3 кун давомида алоҳида кузатувда сақлаш, ёввойи қушларни ушламаслик ва уларнинг гўштини истеъмол қилмаслик зарур.

Бундан ташқари, уй паррандаларини сўйиш ва таом тайёрлашда тозаликка эътибор бериш, тана ҳарорати 38 даража ва ундан юқорига кўтарилиб, нафас сиқиши, йўтал белгилари бўлган беморлар тезда яшаш манзилидаги оилавий шифокорга ёки даволаш профилактика муассасаларига хабар беришлари шарт.

Ушбу инфекциянинг ҳудудимизга кириб келишининг олдини олиш учун мамлакатимизда барча чоралар кўрилмоқда. Бу ишда нафақат шифокорлар ва ветеринарлар, балки хонадонида парранда боқаётган барча фуқаролар иштирок этиши лозим.

Қадрли юртдошлар, ўзингиз ва яқинларингизнинг саломатлигига бефарқ бўлманг.

Д.БОЛТАБОЕВА, туман СЭО маркази жамоат саломатлиги хизмати мудири.