PARRANDA GRIPPIDAN SAQLANING

Parranda grippi – oʻlimgarchilik xavfi juda yuqori boʻlgan oʻta xavfli va yuqumli virusli kasallikdir. Ushbu kasallikning virusi barcha turdagi uy parrandalarida hamda sayroqi va yovvoyi qushlarda kasallik keltirib chiqaradi. Parrandalar oʻrtasida havo-tomchi, ogʻiz-najas yoʻli orqali tarqaladi. Kasallik odamdan odamga yuqmaydi lekin kasal qushlardan, parrandalarning goʻshti, qoni, ichki aʼzolaridan oʻtishi mumkin.
Hozirgi kunda kasallikning asosiy manbai suvda suzuvchi yovvoyi qushlar hisoblanadi. Kasallikning alomatlari gripp va oʻtkir respirator kasalliklarga oʻxshab qayd qilinadi.  Gripp kasalligidan farqli ravishda parranda grippi bilan ogʻrigan odamlarda tomoq ogʻrishi, konʼyuktivit, burun oqishi kuzatilmaydi. Ularda yoʻtal, nafas siqishi, tana haroratining 38 darajadan yuqori boʻlishi kuzatiladi. Oʻz vaqtida tibbiy yordam berilmasa, bemorlar oʻrtasida oʻlimgarchilik 70 foizgacha boʻlishi mumkin.

Kasallikka chalinmaslik uchun, avvalo, uy parrandalarining kataklarini yopiq holda saqlash, yaʼni yovvoyi qushlar bilan muloqotda boʻlmasligining oldini olish, ular orasida oʻlimgarchilik holatlari yuz berganda tashlab yubormasdan, tezda yelim xaltaga solib, mahalliy veterinariya boʻlimi xodimlariga  xabar berish, xonadonlarda tovuqlarga qarash uchun bir odamni biriktirish hamda yangidan olingan tovuqlarni 3 kun davomida alohida kuzatuvda saqlash, yovvoyi qushlarni ushlamaslik va ularning goʻshtini isteʼmol qilmaslik zarur.

Bundan tashqari, uy parrandalarini soʻyish va taom tayyorlashda tozalikka eʼtibor berish, tana harorati 38 daraja va undan yuqoriga koʻtarilib, nafas siqishi, yoʻtal belgilari boʻlgan bemorlar tezda yashash manzilidagi oilaviy shifokorga yoki davolash profilaktika muassasalariga xabar berishlari shart.

Ushbu infektsiyaning hududimizga kirib kelishining oldini olish uchun mamlakatimizda barcha choralar koʻrilmoqda. Bu ishda nafaqat shifokorlar va veterinarlar, balki xonadonida parranda boqayotgan barcha fuqarolar ishtirok etishi lozim.

Qadrli yurtdoshlar, oʻzingiz va yaqinlaringizning salomatligiga befarq boʻlmang.

D.BOLTABOYeVA, tuman SEO markazi jamoat salomatligi xizmati mudiri.