Tumanimizda chorvachilik va parrandachilik sohalari yanada rivojlanmoqda

Mamlakatimizda chorvachilik tarmogʻini jadal rivojlantirish, zamonaviy va innovatsion uslublarni joriy etish, mahsulotlar ishlab chiqarish hajmini oshirish va turlarini kengaytirish, shuningdek, aholini mahalliy sharoitda ishlab chiqarilgan sifatli va arzon chorva mahsulotlari bilan uzluksiz taʼminlash hamda chorvachilikka ixtisoslashgan korxonalarni davlat tomonidan qoʻllab-quvvatlash borasida keng qamrovli ishlar olib borilmoqda. Shu maqsadda qabul qilingan Oʻzbekiston Respublikasi Prezidentining “Chorvachilik tarmogʻini davlat tomonidan koʻllab-quvvatlashning qoʻshimcha chora-tadbirlari toʻgʻrisida” qarori bu boradagi tizimli ishlarni tashkil etishda muhim dasturulamal boʻlib xizmat qilmoqda.

Joriy yilning 10-avgust sanasida Oʻzbekiston Respublikasi Vazirlar mahkamasi huzuridagi Agrosanoat majmuyi ustidan nazorat qilish inspektsiyasi Qoraqalpogʻiston Respublikasi boshqarmasi chorvachilik va naslchilik ustidan nazorat qilish shoʻbasi katta inspektori Sarvar Matyakubov, Inspektsiyaning tuman boʻlimi katta inspektori Jahongir Haydarov tumanimizda faoliyat yuritayotgan chorvachilik komplekslari faoliyati bilan tanishdilar hamda sohada qabul qilinayotgan qonun hujjatlari mazmun-mohiyati yuzasidan tushuntirishlar olib bordilar.

Xususan, masʼullar Toʻlqin ovulidagi naslchilik yoʻnalishidagi “Polvonboy ovuli” masʼuliyati cheklangan jamiyatining faoliyati bilan tanishdilar. Mazkur masʼuliyati cheklangan jamiyatida jami 245 bosh qoramollar mavjud boʻlib, chorvachilikni yanada rivojlantirish maqsadida Belorusiya davlatidan 33 bosh naslli qoramollar olib kelinishi uchun davlat tomonidan 66 mln soʻm subsidiya ajratilgan.  “Polvonboy ovuli” masʼuliyati cheklangan jamiyatida bir kunda 700 litrga yaqin sut mahsuloti yetishtiriladi. Aholini arzon oziq-ovqat bilan taʼminlash, goʻsht va sut mahsulotlarini yetkazish maqsadida bozorlarda yarmarka tashkil qilingan.

Aytish kerakki, tumanda hozirgi kunda jami 143 ta chorvachilik yoʻnalishida faoliyat yuritayotgan tadbirkorlik subektlari mavjud. Jumladan, qoramolchilik yoʻnalishida 52 ta fermer xoʻjaligi faoliyat olib bormoqda, shundan 13 tasi naslchilik yoʻnalishida, qoʻy-echkichilik yoʻnalishida 3 ta fermer xoʻjaligi, baliqchilik yoʻnalishida 75 ta fermer xoʻjaligi, asalarichilik yshnalishida 3 ta fermer xoʻjaligi, parrandachilik yoʻnalishida 10 ta fermer xoʻjaligi faoliyat olib bormoqda.

Tumanimizda hozirgi kunda jami 3803 bosh qoramollar mavjud boʻlib, joriy yil hisobiga koʻra tumanga chet davlatlaridan jami 165 bosh naslli qoramollar olib kelingan. Oʻzbekiston Respublikasi Vazirlar Mahkamasining “Chorvachilik tarmogʻiga davlat tomonidan subsidiya ajratishni tartibga soluvchi normativ-huquqiy hujjatlarni tasdiqlash toʻgʻrisida”gi qaroriga binoan 330 mln sum subsidiyalar ajratilib, chet davlatlaridan yil yakuniga qadar tumanga yana 655 bosh naslli qoramollar olib kelish rejalashtirilgan.

Shuningdek, tumanda 10 ta parrandachilik subektlari faoliyat olib borayotgan boʻlib, ularda jami 61 ming 900 bosh parrandalar yetishtirilmoqda. Mazkur parrandachilik subektlarida yiliga 250 mingdan ortiq tuhum va 650 tonnaga yaqin goʻsht mahsulotlari ishlab chiqarilmoqda.

Tumanda parrandachilikni yanada rivojlantirish borasida “Oʻrta qala chorvadori” agrofirmasi samarali faoliyat yuritib kelmoqda. Yangi zamoanaviy binoda faoliyat yuritayotgan agrofirma yangi texnologiyalar bilan taʼminlangan. Agrofirmada jami 30 ming bosh parranda parvarish qilinib kelinmoqda. “Oʻrta qala chorvadori” agrofirmasi tomonidan bir oy davomida 80-90 tonna parranda goʻshti tayyorlanib, aholiga arzon va sifatli goʻsht mahsulotlari yetkazib kelinmoqda.

Tuman hokimligining Axborot xizmati.