Xavfli virusni yuqtirib olishdan saqlaning

Koronavirus deya nom olgan balo nafaqat xalqimiz, dunyo mamlakatlari aholisi boshiga ham oʻta ogʻir kunlarni soldi.

Ammo tashvishli kunlar ortda qoldi. Ahillik, hamjihatlik, qatʼiy intizom asosida amalga oshirilgan rejali tadbir va muolajalar oʻz samarasini berdi. Koronavirus infektsiyasining oʻchogʻi sekin-asta soʻna boshladi. Ammo bu undan xalos boʻldik, degani emas. Qolaversa, mamlakatimiz boʻyicha kuniga 200-300 nafar atrofida odamlarning koronavirus infektsiyasiga chalinayotganligi bizni yanada ogoh, hushyor, sergak, intizomli boʻlishga undamogʻi  zarur va shart.

Tezkor jarayonda  mamlakatimizga, shu jumladan, tumanimizga ham birinchi va ikkinchi bosqichi uchun Astra Zeneka vaktsinasidan 3200 doza, oʻzbek-xitoy (ZF-UZ-VAC2001) vaktsinasidan 8500 doza olib kelindi.

Hozirgi kunda 24686 nafar aholini bosqichma-bosqich emlash rejalashtirilgan boʻlsa, shundan birinchi bosqichda 6831 nafar, ikkinchi bosqichda 2293 nafar aholi qatlamida emlashni samarali oʻtkazishga muvaffaq boʻldik. Birinchi va ikkinchi bosqichda  emlash  olgan aholi qatlamida  uch kunlik  patronaj kuzatuvlari yoʻlga qoʻyildi. Emlashdan soʻng, nojoʻya holatlar kuzatilganligi haqida  murojaatlar kelib tushmadi.

Yurtimizda nishonlanayotgan bayram tadbirlari, toʻy va marosimlarda ham niqob taqish, qoʻllarimizni himoyalovchi vositalar bilan  zararsizlantirish, oraliq masofani saqlash kabi qoidalarga qatʼiy rioya etsak, eng avvalo, oʻzimiz, oila aʼzolarimiz, xalqimizni koronavirus infektsiyasi yuqishidan asragan boʻlamiz.

M.AMANKULOV, tuman SEO va JS  boʻlimi vrach-epidemiologi.

B.Matmurodova, boʻlim huquqshunosi.