КОНСТИТУЦИЯМИЗ – БАРЧАМИЗ УЧУН АСОСИЙ МЕЗОН

“Конституция” сўзи турли даврларда, турли маъноларда қўлланилган бўлса-да, бугунги кунда у олий юридик кучга эга бўлган, амалдаги қонун ва меъёрий ҳужжатлар пойдеворини ташкил этадиган, ўзгартириш ва қўшимчалар киритиш қатъий назорат қилинадиган Aсосий Қонунни англатади.

Мамлакатимиз Конституциясида юртдошларимизнинг келажак авлодларга озод ва обод Ватан қолдириш, уларнинг бахт-у камолини кўришдек орзу-ҳаваслари ўз ифодасини топганлиги билан бирга, давлатимиз раҳбари таъкидлаганларидек, унда жамики дунёвий неъматлар орасида энг улуғи – Инсон деган фикр илгари сурилган. Шу асосда фуқаро – жамият – давлат ўртасидаги ўзаро муносабатнинг оқилона ҳуқуқий ечими белгилаб берилган. Aсосий Қонунимизда давлатимизнинг, жамиятимизнинг ва ҳар бир фуқаронинг ҳуқуқ ва бурчлари бир-бирига уйғунлаштирилган ва мувофиқлаштирилган.

 Умуман, Конституциямизда кўп йиллик миллий давлатчилигимиз анъаналари инобатга олиниши билан бирга, жаҳон конституцияларининг тажрибаларидан ҳам кенг фойдаланилган. Шу йўл билан унинг энг инсонпарвар, демократик ва адолатли Қомуслардан бири бўлишига эришилган. Йиллар ўтган сайин Конституциямизнинг ҳаётимиз, тараққиётимиз учун аҳамияти қанчалик катта ва танлаган йўлимиз ниҳоятда тўғри эканлигига қайта-қайта ишонч ҳосил қилаверамиз.

Мамлакатимиз ижтимоий-сиёсий ҳаётидаги энг муҳим саналардан бири – Конституция қабул қилинганлигининг 28 йиллиги арафасида шуни алоҳида эътироф этиш лозимки, Конституциямиз вақт ўтган сари ўз нуфузини, халқаро миқёсдаги обрў-эътиборини мустаҳкамлаб бормоқда. Бизнинг мақсадимиз эса унинг жамиятдаги нуфузи ва аҳамиятини, мазмун ва моҳиятини фуқароларнинг, айниқса, ёш авлоднинг онг-идрокига чуқурроқ сингдиришдир.

 Бир сўз билан айтганда, Конституциямиз барчамиз учун асосий мезон бўлиши, унинг қоидалари ҳаётимизнинг асосий қоидалари ва мақсадларига айланиши даркор.

 Замира Отажонова, 36-сонли мактаб ўқитувчиси.