Ўзига хос тажриба мактабига айланган газета

Матбуот – шунчаки ахборот манбаи, халқни жамиятимизда рўй бераётган янгиликлардан, ўзгаришлардан воқиф этувчи воситагина эмас, балки ҳар бир халқни илмий-маърифий мушоҳада юритишга ундовчи кучдир. Қолаверса, бугунги матбуот – ҳар бир инсонга замон билан ҳамнафас равишда ижтимоий-иқтисодий ҳаётда рўй бераётган тараққиёт омилларидан ижобий хулосалар чиқариб, ўз ҳаёт тарзини ўзгартириш, янгилаш имконини берувчи маънавий-маърифий тарбия дорилфунунидир. Буни Амударё тумани матбуоти мисолида яққол кўриш мумкин. Сабаби, илк сони 1934 йилдан чиқа бошлаган туман газетаси ўзининг 80 йиллик фаолияти давомида туман халқига садоқат билан хизмат қилиб қелмоқда. Турли йилларда ҳар хил номлар билан чоп этилиб келинган "Тараққиёт кўзгуси” газетаси ўз фаолиятининг барча босқичларида матбуот сўзининг, ҳақиқат ва адолатнинг қудратини амалда намоён этиб, халқ қалбидан муносиб жой ола билди ва Аму элининг ишончига, қайноқ меҳрига сазовор бўлди. Бугунги тезкор ахборот асрида кўпчилик туман газеталари инқирозга юз тутаётган, ўз даврийлигини таъминлай олмаётган бир пайтда "Тараққиёт кўзгуси” газетаси салкам 6000 нусхада, ҳар ҳафтада чоп этилиб, ўз вақтида обуначиларига етиб бораётгани туман газетаси нуфузининг нечоғлик юқорилигидан далолатдир.

Аввало шуни алоҳида қайд этиш керакки, туман газетасининг бундай мавқега етишишидаги энг биринчи омил бу – таҳририятда етук ва билимдон, малакали журналистлардан иборат аҳил ижодий жамоанинг шаклланганлигидир. Ўз касбининг фидойилари бўлган олий маълумотли журналистлар – газетанинг собиқ муҳаррирлари Қорақалпоғистон Республикасида хизмат кўрсатган маданият ходими Хонимжон Ражабова, Қорақалпоғистон Республикасида хизмат кўрсатган журналистлар Гулнора Матёқубова, Саъдулла Хўжаниёзов, Робия Йўлдошева, Ўзбекистон Журналистлари ижодий уюшмаси аъзоси, "Шуҳрат” медали соҳиби Алламберган Жуманиёзов, тажрибали журналист Ойгул Ражабовалар яратган ўзига хос ижод бўстони бугунги кунда нафақат Қорақалпоғистон Республикаси, балки Ўзбекистон миқёсидаги ибратли журналистика мактаби даражасига етди, десам муболаға бўлмайди.

Бугунги кунда ўзига хос тажриба мактабини яратган ижодий жамоа эришаётган ютуқлар салмоғи янада улкан. Газетанинг ёш муҳаррири Ғуломжон Ешниёзов раҳбарлигида 2012 йилдан бошлаб Қорақалпоғистон Республикасида биринчи бўлиб интернетда ўзининг мустақилвеб сайтига, 2014 йилнинг март ойидан бошлаб мустақил "Менинг оилам” илова нашрига эга бўлган газетатаҳририяти ходимларининг барчаси учун ўқиш, изланиш, ютуқларни янада бойитиб бориш доимий ижодий анъанага айланган. Шу боис, газетанинг ҳар бир сонида ёритилаётган мақолаларнинг қамров майдони кенг, ранг-баранг, халқчил. Шуниси эътиборга лойиқки, таҳририят журналистлари ҳар бир матн устида ўзларига юксак талаблар қўйган ҳолда ишлайдилар, ҳатто республика миқёсидаги газеталар даражасидан ўтиб ижод қилишга интиладилар.

Агар газета тахламлари билан танишсангиз, унинг деярли ҳар бир сонида туман ҳаётининг барча соҳалари акс этиб турганлигига гувоҳ бўласиз. Энг муҳими, саҳифаларда қайноқ ва жўшқин ҳаёт нафаси уфуриб туради. Газета шунинг учун ҳам туман халқи ҳаётининг ажралмас бир қисмига – юксак маънавият мактабига айланган.

Мана, бир ойдирки, амударёликлар Мустақилликнинг 23 йиллиги ва туман матбуотининг 80 йиллиги муносабати билан туман ҳокимининг 2014 йил 7 июлдаги "Мустақилликни мустаҳкамлаш ва миллий истиқлол ғояларини тарғиб қилишда "Тараққиёт кўзгуси” газетасининг ўрни ва аҳамияти” мавзусида тарғибот ойлигини ўтказиш тўғрисида”ги қарорига мувофиқ газета ижодкорлари билан юзма-юз мулоқотларда, давра суҳбатлари, адабий-бадиий, мусиқий тадбирларда иштирок этишмоқда. Ҳеч бир замонда маҳаллий раҳбарият томонидан матбуотга бунчалик эътибор ва рағбат кўрсатилмаган. Ва яна шуни баралла айтаманки, Қорақалпоғистон Республикаси журналистикаси тарихида бундай тарғибот ойлиги ҳеч бир таҳририятда ўтказилган эмас! Бу – аввало маҳаллий раҳбариятнинг матбуотга эътибори кучлилигидан, қолаверса, "Тараққиёт кўзгуси” газетасининг халққа ниҳоятда яқинлиги, халқнинг ҳур ва эркин фикрлар айта оладиган чинаккам минбарига айланганидандир. Бу – ҳақиқий ибрат мактаби, ҳозирги замон ўзбек журналистикасининг том маънодаги тажриба Дорилфунунидир. Бу ибрат мактабидан, бу тажриба Дорилфунунидан барча ҳамкасбларимиз сабоқ олса арзийди ва оммалаштиришга муносибдир.

Мен "Тараққиёт кўзгуси” газетасинингжўшқин калбли ижодий жамоасини, жамоатчи мухбирларини, газетасини севган, маънавиятга ошно барча амударёликларни туман матбуотининг 80 йиллиги ҳамда яқинлашиб келаётган мустақилликнинг 23 йиллиги билан самимий табриклайман. Таҳририят ижодкорларига жўшқинлик, соғлик, эл-юртга осойишталик тилайман.

Кенгесбой РЕЙМОВ,

Ўзбекистон Журналистлари ижодий уюшмасининг Қорақалпоғистон Республикаси бўлими раиси.