ЭЛ ДАРДИГА ДАРМОН ШИФОКОРЛАР

Тиббий хизмат кўрсатиш соҳасида жарроҳлик муолажалари муҳим ўрин тутади. Шу боис, мамлакатимиз тиббиёт тизимидаги жарроҳлик бўлимлари фаолиятини такомиллаштириш, мазкур йўналишга энг замонавий технологияларни жорий этиш, халқ саломатлигини муҳофаза қилишни давр талаблари даражасига кўтариш, соҳани энг сўнгги русумдаги тиббий асбоб-анжомлар билан таъминлашга алоҳида эътибор қаратилмоқда.

Туман Тиббиёт бирлашмаси ҳузуридаги режали жарроҳлик бўлими замонавий  меъморий ечимга эга уч қаватли бинонинг учинчи қаватида жойлашган бўлиб, мазкур бино 2013 йилда тўлиқ таъмирланиб, реконструкция қилинган, 30 бемор ўрнига мўлжалланган бўлим таркибида 20 та жарроҳлик ва 10 та урологик касалликлар ўрни мавжуд.

Бўлим узлуксиз электр энергияси ва иссиқлик манбаи билан таъминланган. Ҳар бир хона доимий иссиқ ва совуқ сув билан таъминланган бўлиб, беморлар учун зарур маиший имкониятлар яратилиб, маҳаллий канализация тармоғига уланган  ва хоналар тиббий линолеум билан қопланган.

Айни пайтда режали жарроҳлик бўлимида 6 нафар олий тоифали мутахассис шифокорлар фаолият  олиб боришмоқда. Улардан 3 нафари катталар ва 1 нафари болалар жарроҳлари, 2 нафари эса олий тоифали уролог-шифокорлардир. Беморларга иккита секторда тун-у кун беминнат хизмат кўрсатилади. Биринчи  секторда йирингли жарроҳлик хонаси, иккинчи секторда эса тоза боғлаш хонаси бўлиб, иккала сектор алоҳида жойлаштирилган. Ҳар иккала сектор хоналарида беморларга малакали тиббиёт ходимлари хизмат кўрсатишади.

Бўлимнинг жарроҳлик блокида жарроҳлик амалиётларини мувафаққиятли амалга ошириш учун барча имкониятлар яратилган. Анестезиолог хонаси, интенсив жонлаштириш хонаси, жарроҳлик амалиёти учун зарур ашёларни тайёрлаш хонаси, стерилланган жарроҳлик анжомлари ва ювиниш хоналари ҳамда жарроҳлик амалиётлари учун махсус зал шифокорлар учун қулай ва кетма-кетликда жойлашганлиги боис, жарроҳлик амалиётларини ўтказиш жараёнида ҳеч бир муаммо бўлмайди.

Жарроҳлик зали энг замонавий тиббий асбоб-ускуналар билан жиҳозланиб, бу ерда доимий мўътадил ҳаво шароитини сақлаб туришга мўлжалланган янги кондиционер ўрнатилган. Шифокорлар учун қулай жарроҳлик столи, электро-коогулятор – ЭХВЧ-300 аппарати, Россия давлатида ишлаб чиқарилган ФАЗА-21 наркоз аппаратлари  жарроҳлик муолажаларини муваффақиятли ўтказиш имконини бермоқда.

ТТБ томонидан бўлимга энг зарур ёритгичлар, стерилловчи ва қуритувчи жиҳозлар ўрнатилгани бўлим шифокорлари учун яна бир қулайлик бўлди.

Айниқса, 2018 йилда “Саломатлик – 3” лойиҳаси доирасида бўлимга келтирилган йирик жарроҳлик ускуналари тўплами шифокорларнинг янада унумли ва сифатли ишлашлари учун зарур имконият яратди.

Айни пайтда режали жарроҳлик бўлимида  30 нафар ходим фаолият юритишмоқда. Улардан 6 нафари олий тоифали мутахассис шифокорлар, 11 нафари ўрта махсус маълумотли ҳамширалар, 13 нафари эса энагалардир. Бўлим раҳбари, олий тоифали жарроҳ-шифокор Р.Жуманиёзов, олий тоифали жарроҳлар К.Аманов, Б.Явидов, жарроҳлик блоки катта ҳамшираси Ч.Ўрозоқова, бўлимнинг катта ҳамшираси Р.Нурматова, муолажа ҳамшираси Н.Раҳимова, навбатчи ҳамширалар Р.Аширова, З.Маткаримоваларнинг ширин, самимий  муомалаларидан беморлар ҳамиша миннатдор.

Бўлимга 2021 йилнинг ўтган 10 ойи давомида 990 нафар турли тоифадаги беморлар қабул қилиниб, уларнинг деярли барчаси соғломлаштирилиб, оилалари бағрига қайтарилди.

Халқимизда асрлар синовидан ўтган ибратли ибора бор: “Жон оғриса –табиб малҳам”,  дейишади. Режали жарроҳлик бўлимига малҳам истаб келгувчилар учун уларга  ширин муомалалари, шифобахш қўллари, илм-у  салоҳияти билан қувват бағишлаб, дардларига дармон бўлаётган саломатлик посбонларига:

– Касбингиздан камол топинг, Сиз азизларнинг  меҳрингиздан эл-у халқ омон бўлсин, шифокорлар! – деймиз.

Робия ЙЎЛДОШЕВА.