ИССИҚХОНАЛАРДА ҚИШДА ҲАМ ЁЗ НЕЪМАТЛАРИ ЕТИЛМОҚДА

Қишлоқ аҳолисининг асосий қисмининг бандлиги таъминланаётган қишлоқ хўжалигига замонавий илм-фан ютуқлари, илғор технологиялар жорий этилаётганлиги маҳсулот етиштириш ҳажми ошишига, экин майдонларидан самарали фойдаланишга асос бўлаётир.

Айниқса кейинги йилларда иссиқхоналарда турли сабзавотлар етиштирилаётгани, эртаги экинлар кўчатлари етиштирилиб, очиқ майдонга кўчириб ўтқазилаётгани сабзавот ва полиз маҳсулотларининг эрта етилишини, бозорларимиз тўкинлигини таъминлаяпти.

Ўзбекистон Республикаси Вазирлар Маҳкамасининг “Оилавий тадбиркорликни қўллаб-қувватлаш дастури доирасида боғдорчилик, узумчилик ва иссиқхона хўжалигини ривожлантириш чора-тадбирлари тўғрисида”ги қарорида иссиқхоналар қуриш ҳамда уларни тижорат банклари, лизинг компаниялари орқали аҳолига лизинг ва кредит шартлари асосида бериш назарда тутилган. Шунингдек иссиқхона хўжалигини ривожлантиришда оилавий тадбиркорликни йўлга қўйиш, уларни давлат томонидан қўллаб-қувватлаш йўл-йўриқлари баён этилган.

Бу каби имкониятлар юртимизда иссиқхоналар экин майдонларининг ҳажми ошишига, сони кўпайишига ва маҳсулот етиштиришнинг кўпайишига замин яратмоқда.

Амударё туманида ҳам бу борада олиб борилаётган саъй-ҳаракатлар туфайли бозорларимизда сабзавот, мева-чевалар сероб. Янги узилган помидор, бодринг, булғор қалампири, турли кўкатлар изғиринли қиш ҳавосида ҳам ёз тафтини, пишиқчилик даврини эсимизга солади.

Кейинги йилларда туманимиз овул ва маҳаллалари аҳолиси ўз томорқа ерларида кичик конструкцияли замонавий иссиқхоналар қуриб, сабзавотлар, эртаги сабзавот экинлари кўчатлари етиштиришга алоҳида эътибор қаратишмоқда.

Холимбег овулида томорқа ерларидан мўл ҳосил етиштириш ҳадисини олган, даромад манбаларини яратиб, оила аъзоларининг бандлигини таъминлаётган тадбиркор деҳқонлар кўп. Каримбой Ўрозбоев ҳам шуларнинг бири. У ўз томорқасида “Микрокредитбанк” туман филиалининг 100 миллион сўмлик имтиёзли кредити ҳисобига 10 сотих майдонда замонавий иссиқхона барпо этди. Иссиқхона “Асака инновацион томорқа” масъулияти чекланган жамияти томонидан қурилди.

Тажрибали деҳқон ушбу иссиқхонасига “Стат элегант” навли номидор уруғини экиб, фарзандлари, келинлари кўмагида парвариш қилди.

Ҳозирги кунда ҳар сотихида 300-350 дона помидор кўчатларининг ҳосили пишай деб турибди. Ҳар бир туп помидор поясидаги меваларни кўрган кўз қувонади.

Каримбой Ўрозбоев деҳқончиликда улкан тажриба тўплаган, экинлардан мўл ҳосил олишда ўзи хос билим ва малакага эга инсон.

У эндиликда иссиқхона ҳам даромад манбаи эканлигини, фарзандлари, келинлари бандлигини таъминлабгина қолмай, оиласи фаровонлигини ҳам таъминлаши мумкинлигини ўз фаолиятларида кўрди.

Ҳозирги кунда пишиб етилай деб турган помидорлар халқимиз дастурхони тўкинлигига муносиб ҳисса  бўлиб қўшилади. Ҳа, уларнинг иссиқхонасида изғирин, қор-қировли кунларда ёз нематлари етилмоқда.

Ойгул РАЖАБОВА.