ISSIQXONALARDA QIShDA HAM YoZ NEʼMATLARI YeTILMOQDA

Qishloq aholisining asosiy qismining bandligi taʼminlanayotgan qishloq xoʻjaligiga zamonaviy ilm-fan yutuqlari, ilgʻor texnologiyalar joriy etilayotganligi mahsulot yetishtirish hajmi oshishiga, ekin maydonlaridan samarali foydalanishga asos boʻlayotir.

Ayniqsa keyingi yillarda issiqxonalarda turli sabzavotlar yetishtirilayotgani, ertagi ekinlar koʻchatlari yetishtirilib, ochiq maydonga koʻchirib oʻtqazilayotgani sabzavot va poliz mahsulotlarining erta yetilishini, bozorlarimiz toʻkinligini taʼminlayapti.

Oʻzbekiston Respublikasi Vazirlar Mahkamasining “Oilaviy tadbirkorlikni qoʻllab-quvvatlash dasturi doirasida bogʻdorchilik, uzumchilik va issiqxona xoʻjaligini rivojlantirish chora-tadbirlari toʻgʻrisida”gi qarorida issiqxonalar qurish hamda ularni tijorat banklari, lizing kompaniyalari orqali aholiga lizing va kredit shartlari asosida berish nazarda tutilgan. Shuningdek issiqxona xoʻjaligini rivojlantirishda oilaviy tadbirkorlikni yoʻlga qoʻyish, ularni davlat tomonidan qoʻllab-quvvatlash yoʻl-yoʻriqlari bayon etilgan.

Bu kabi imkoniyatlar yurtimizda issiqxonalar ekin maydonlarining hajmi oshishiga, soni koʻpayishiga va mahsulot yetishtirishning koʻpayishiga zamin yaratmoqda.

Amudaryo tumanida ham bu borada olib borilayotgan saʼy-harakatlar tufayli bozorlarimizda sabzavot, meva-chevalar serob. Yangi uzilgan pomidor, bodring, bulgʻor qalampiri, turli koʻkatlar izgʻirinli qish havosida ham yoz taftini, pishiqchilik davrini esimizga soladi.

Keyingi yillarda tumanimiz ovul va mahallalari aholisi oʻz tomorqa yerlarida kichik konstruktsiyali zamonaviy issiqxonalar qurib, sabzavotlar, ertagi sabzavot ekinlari koʻchatlari yetishtirishga alohida eʼtibor qaratishmoqda.

Xolimbeg ovulida tomorqa yerlaridan moʻl hosil yetishtirish hadisini olgan, daromad manbalarini yaratib, oila aʼzolarining bandligini taʼminlayotgan tadbirkor dehqonlar koʻp. Karimboy Oʻrozboyev ham shularning biri. U oʻz tomorqasida “Mikrokreditbank” tuman filialining 100 million soʻmlik imtiyozli krediti hisobiga 10 sotix maydonda zamonaviy issiqxona barpo etdi. Issiqxona “Asaka innovatsion tomorqa” masʼuliyati cheklangan jamiyati tomonidan qurildi.

Tajribali dehqon ushbu issiqxonasiga “Stat elegant” navli nomidor urugʻini ekib, farzandlari, kelinlari koʻmagida parvarish qildi.

Hozirgi kunda har sotixida 300-350 dona pomidor koʻchatlarining hosili pishay deb turibdi. Har bir tup pomidor poyasidagi mevalarni koʻrgan koʻz quvonadi.

Karimboy Oʻrozboyev dehqonchilikda ulkan tajriba toʻplagan, ekinlardan moʻl hosil olishda oʻzi xos bilim va malakaga ega inson.

U endilikda issiqxona ham daromad manbai ekanligini, farzandlari, kelinlari bandligini taʼminlabgina qolmay, oilasi farovonligini ham taʼminlashi mumkinligini oʻz faoliyatlarida koʻrdi.

Hozirgi kunda pishib yetilay deb turgan pomidorlar xalqimiz dasturxoni toʻkinligiga munosib hissa  boʻlib qoʻshiladi. Ha, ularning issiqxonasida izgʻirin, qor-qirovli kunlarda yoz nematlari yetilmoqda.

Oygul RAJABOVA.