Дунёда энг улкан бойлик саломатликдир
Кўклам! Гарчи ҳудудимизда ҳамон қиш об-ҳавоси ҳукмронлик қилаётган бўлса-да, фасллар алмашинувини қувониб қарши олдик. Шундай дамларда узоқ давом этган қишдан сўнг баҳорни соғинганимизни ҳис қиламиз. Қалбимизга жўшқинлик кириб келади. Она табиатимизнинг фусункор фасли байрамлар, қувончли кунлар кўплиги билан ҳам азиз. Айниқса, 8 март – Халқаро хотин-қизлар куни муҳтарама онахонларимиз, опа-сингилларимиз учун унутилмас таассуротлар ҳадя этади. Бу аввало жамиятимизда аёл-қизларга ғамхўрлик тобора кучаяётгани, аёллик, оналик мақоми юксак тутилиб, уларнинг соғлиғи муҳофаза қилинаётганининг ифодасидир.
Мен ўрта мактабни тугатгач, Тошкент Давлат Тиббиёт олийгоҳида ўқидим. 1985 йилда олийгоҳни акушер-гинеколог мутахассислиги бўйича тугатиб, Нукус шаҳридаги Республика туғруқхонасида интернатура ўтадим. 1986 йилдан бери Амударё туман Тиббиёт бирлашмаси туғруқ комплексида акушер-гинеколог бўлиб ишлаб келаяпман.
Шифокорлик фаолиятимни бошлаганимга бу йил 37 йил тўлаяпти.
Момоларимиз кўзи ёриётган аёлни “икки дунё оралиғида” деб бежиз айтишмайди. Меҳнат фаолиятим давомида неча-неча юзлаб аёлларнинг кўзи ёришида тиббий кўмак берганимдан, ҳам туғруқ асоратларсиз кечишига, она-бола соғлиғига путур етмаслигига эришганимдан, неча-неча аёлларни даволаб, фарзандли бўлишларига сабабчи бўлганимдан доимо фахрланиб яшайман. Ҳомиладорликка монелик қилувчи касалликлари даволаниб, она бўлишга умид уйғониб, кўзлари чақнаб турган аёлни кўриш ҳам шифокор учун бир бахт. Бу – унинг меҳнати самараси.
Мамлакатимизда оналик ва болалик муҳофазасига, соғлом онадан соғлом фарзандлар дунёга келишига эришишга улкан эътибор берилаётгани биз шифокорларни жуда қувонтиради. Бу йўлда туғруқ ёшидаги аёллар ҳар йили чуқурлаштирилган тиббий кўриклардан ўтказилиб, зарур ҳолларда даво муолажалари олиб борилаяпти. Ҳомиладор аёллар мунтазам тиббий назоратга олиниб, она ва ҳомила ҳолати кузатиб борилади.
Ўтган йили туман бўйича 5169 нафар ҳомиладор аёлларнинг 4750 нафари ҳомиладорликнинг 14 ҳафтасигача ҳисобга олинган. Уларнинг 3902 нафари туманда УТТ аппаратида, 848 нафари Республика Скрининг марказида скрининг текширувидан ўтказилган. Акушерлик патологияси бўлган 170 нафар аёлнинг ҳомиладорлиги тўхтатилган.
Бизнинг мақсадимиз – оила бекаси, фариштаси бўлган аёлларнинг ва ҳаётимиз давомчилари бўлган болаларнинг соғлом ва бахтиёр яшашидир. Ҳа, дунёда энг катта бойлик – соғлиқдир.
Динора АБДУРАИМОВА,
туман ТТБ бош акушер-гинекологи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
