УСТОЗЛАРИМДАН МИННАТДОРМАН
2011 йилнинг баҳор фасли. Айни “Сўнгги қўнғироқ” байрами арафаси эди. “Амударё ҳақиқати” (ҳозирги “Тараққиёт кўзгуси” газетаси) газетасидан уйимизга бир нечта нусха келди. Мазкур газетага мен “Сўнгги қўнғироқ”, “Устозимга” шеърларимни юборган эдим. Буни қарангки, шеърларим газета саҳифаларида босилиб чиқибди.
Шу пайтда шеърларимни кўрган тенгдошларим менга ҳавас билан қарайдиган бўлди. Энг муҳими, мактабимизда муштарийлар эътирофига сазовор бўлдим.
Албатта, газета саҳифаларида босилиб чиққан митти шеърларим менинг ҳаёт йўлимнинг дебочаси бўлди.
Шундан сўнг, ҳикоя, мақолаларим ҳам газета саҳифаларида ёритила бошлади. Мана шундан буён ўн йилдан ортиқ вақт ўтди. Шуни алоҳида таъкидлаш лозимки, қалам аҳлининг доимий мададкори ва суянчи – унинг устоз-мураббийи саналади. Ортда қолган йиллар мобайнида “Тараққиёт кўзгуси” таҳририятида фаолият олиб бораётган журналистлар менга устозлик қилдилар. Шулардан Алламберган Жуманиёзов, Ғуломжон Ешниёзов, Робия Йўлдошева, Ойгул Ражабова, Озода Худойбергановалар менга ўз билимларини беришди.
Дарвоқе, оиладаги адабий муҳит мен учун онамнинг касбини танлашда бош омил бўлган, десам янглишмайман. “От изини той босар”, деганидек бугунги кунда Қорақалпоқ Давлат Университети Журналистика факультетининг 4-босқич талабасиман.
Айрим юртдошларимиз босма нашрлар йўқолиб, уларнинг ўрнини интернет сайтлари эгаллашини такрорлашмоқда. Бу мутлақо нотўғри. Сабаби, дунёнинг ривожланган давлатларида интернет нашрлари биздагига нисбатан ўн карра тараққий этган. Аммо шундай бўлса-да, давлатларда матбуот миллионлаб нусхада чоп этилмоқда. Чунки, газета ва журналларни юз йилдан кейин ҳам қўлга олиб ўқишимиз мумкин.
Чиндан ҳам булар исбот талаб қилмайдиган ҳақиқатдир. Негаки, матбуот ҳамиша жамият кўзгуси бўлиб келган, шундай бўлиб қолади ҳам. Мен ушбу фурсатдан фойдаланиб, “Тараққиёт кўзгуси” газетаси таҳририяти жамоасини, умр-у жонини ижодга бахшида этган устозларни табаррук сана – Матбуот ва оммавий ахборот воситалари ходимлари куни билан муборакбод этаман!
Севара Исмоилова,
ҚДУ талабаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
