USTOZLARIMDAN MINNATDORMAN

2011-yilning bahor fasli. Ayni “Soʻnggi qoʻngʻiroq” bayrami arafasi edi. “Amudaryo haqiqati” (hozirgi “Taraqqiyot koʻzgusi” gazetasi) gazetasidan uyimizga bir nechta nusxa keldi. Mazkur gazetaga men “Soʻnggi qoʻngʻiroq”, “Ustozimga” sheʼrlarimni yuborgan edim. Buni qarangki, sheʼrlarim gazeta sahifalarida bosilib chiqibdi.
Shu paytda sheʼrlarimni koʻrgan tengdoshlarim menga havas bilan qaraydigan boʻldi. Eng muhimi, maktabimizda mushtariylar eʼtirofiga sazovor boʻldim.
Albatta, gazeta sahifalarida bosilib chiqqan mitti sheʼrlarim mening hayot yoʻlimning debochasi boʻldi.
Shundan soʻng, hikoya, maqolalarim ham gazeta sahifalarida yoritila boshladi. Mana shundan buyon oʻn yildan ortiq vaqt oʻtdi. Shuni alohida taʼkidlash lozimki, qalam ahlining doimiy madadkori va suyanchi – uning  ustoz-murabbiyi sanaladi. Ortda qolgan yillar mobaynida “Taraqqiyot koʻzgusi” tahririyatida faoliyat olib borayotgan jurnalistlar menga ustozlik qildilar. Shulardan Allambergan Jumaniyozov, Gʻulomjon Yeshniyozov, Robiya Yoʻldosheva, Oygul Rajabova, Ozoda Xudoyberganovalar menga oʻz bilimlarini berishdi.
Darvoqe, oiladagi adabiy muhit men uchun onamning kasbini tanlashda bosh omil boʻlgan, desam yanglishmayman. “Ot izini toy bosar”, deganidek bugungi kunda Qoraqalpoq Davlat Universiteti Jurnalistika fakultetining 4-bosqich talabasiman.
Ayrim yurtdoshlarimiz bosma nashrlar yoʻqolib, ularning oʻrnini internet saytlari egallashini takrorlashmoqda. Bu mutlaqo notoʻgʻri. Sababi, dunyoning rivojlangan davlatlarida internet nashrlari bizdagiga nisbatan oʻn karra taraqqiy etgan. Ammo shunday  boʻlsa-da, davlatlarda matbuot millionlab nusxada chop etilmoqda. Chunki, gazeta va jurnallarni yuz yildan keyin ham qoʻlga olib oʻqishimiz mumkin.
Chindan ham bular isbot talab qilmaydigan haqiqatdir. Negaki, matbuot hamisha jamiyat koʻzgusi boʻlib kelgan, shunday boʻlib qoladi ham. Men ushbu fursatdan foydalanib, “Taraqqiyot koʻzgusi” gazetasi tahririyati jamoasini, umr-u jonini ijodga baxshida etgan ustozlarni tabarruk sana – Matbuot va ommaviy axborot vositalari xodimlari kuni bilan muborakbod etaman!

Sevara Ismoilova,
QDU talabasi.