Ustozlarimdan minnatdorman

Yurtimizda yoshlarning ilm oʻrganib, iqtidorini oshirishlariga, yuqori marralarni egallab, dunyoga tanilishiga keng yoʻl ochilgan. Taʼlim muassasalarida  oʻquvchilar mukammal bilim olishlari uchun sharoitlar yetarli.

Men taʼlim olgan 40-sonli maktabda ham toʻliq bilim olish uchun barcha imkoniyatlar mavjud. Jonkuyar va fidoyi oʻqituvchilar esa ilm oʻrgatishdan aslo charchashmaydi. Tengdoshlarim qatori men ham barcha fanlarni chuqur oʻzlashtirishga harakat qildim. Ayniqsa, matematika, fizika, kimyo kabi aniq fanlarga juda qiziqdim.  Ingliz tili, rus tilini puxta oʻrganish maqsadida maktabimizdagi toʻgaraklarga faol qatnashdim. Bilimlar bellashuvida, maktabimizda, tumanda oʻtkazilgan turli koʻrik-tanlovlarda, jamoat ishlarida ham ishtirok etib, koʻp yutuqlarni qoʻlga kiritdim.

Ilm egallash yoʻlidagi bu harakatlarim besamar ketmadi. Chunki oʻtgan oʻquv yili yakunida Qoraqalpogʻiston Respublikasidagi “Prezident maktabi”ga kirish uchun oʻtkazilgan imtihonlarda oʻz bilimimni sinab koʻrdim va sinovlardan muvaffaqiyatli oʻtdim. Bu yil men ushbu nufuzli maktabning 7-sinfiga qabul qilindim. Bundan nafaqat ota-onam, ular qatori, albatta, ustozlarim ham juda xursand boʻlishdi.

Shu elda kamolga yetayotgan har bir yosh kabi men ham davlatimizning yuksak  eʼtiboridan, gʻamxoʻrligidan juda ham minnatdorman. Oʻz navbatida bor kuch va bilimimni Vatanim istiqboli, uning taraqqiyoti uchun uchun sarf qilishga tayyorman!

Aziz va muhtaram ustozlarimni bayram bilan chin yurakdan qutlayman!

Abror Shukurullayev, Prezident maktabi oʻquvchisi.