Қиличбойлик моҳир боғбон

Ота-боболаримиз “Яхшидан боғ қолади” – деб бекорга айтишмаган. Экилган ҳар бир ниҳолда инсоннинг қалб-қўридаги бутун меҳри, меҳнати мужассам бўлади. Экилган ўша ниҳоллар вақтлар ўтиб, мевали ёки манзарали дарахтга айланади. У боғбонга тўкин мева-чевалар ҳадия этиб, даромад манбаига айланиш билан бирга халқимиз дастурхони тўкин бўлишини таъминлайди.

Ер билан тиллашиб, унинг барча сир-асрорларидан хабардор бўлган амударёлик Ҳамро Ражабов мана 8 йилдирки, боғдорчилик билан шуғулланиб келади.

Ражабовлар оиласининг саъй-ҳаракатлари билан туманизнинг олис ҳудудларидан бири − Қиличбой овулида файзли ва кўркам боғ яратилган. Умумий ер майдони 40 сотихни ташкил қилувчи ушбу боғда айни кунларда сархил мевалар пишиб етилиб, манзарали дарахтлар кўкка бўй чўзган. Боғбон боғдаги ҳар бир дарахтга ўзгача меҳр беради, асраб-авайлайди, парвариш қилади. Ўз навбатида деҳқон ҳам ердан ва боғдан мўл ҳосил олиб, фаровон турмуш кечирмоқда.

Ҳамро Ражабов ҳар йили 10 минг тупдан ортиқ кўчатлар етиштириб, ҳамқишлоқларини ҳамда туманимизнинг турли ҳудудларида истиқомат қилувчи аҳолини сифатли ва ҳосилдор кўчатлар билан таъминлаб келади. Боғда олма, узум, шафтоли, ўрик, анжир, анор, умуман жаннатмакон юртимизда етиштириладиган кўпчилик меваларнинг турли навлари бор.

Боғбон ушбу кўркам ва файзли боғ орқасидан ҳар йили 50 млн. сўмдан ортиқ даромад кўради. Бугунги кунда мевали ва манзарали дарахтлардан пайвандлаш орқали етиштирилган кўчатлар, мевали дарахтлардан олинган ҳосил оила иқтисодиёти барқарорлигига хизмат қилиб келмоқда.

Боғбон Ҳамро Ражабов топилган даромад ортидан фарзандларини ўқитгани, уйли-жойли қилгани, енгил автомобиллар соҳиби бўлганини мамнуният билан эътироф этади. 80 туп ўрик, 20 туп олма, 200 туп шафтолини парвариш қилиш, ундан олинадиган ҳосилни нест-нобуд қилмай йиғиб-териб олиш катта меҳнат, тажриба ҳамда масъулият талаб этади.

Боғнинг янада гуллаб-яшнаши учун боғбон ҳар бир агротехник тадбирни кечиктирмасдан, ўз вақтида ҳамда маромига етказиб бажаради. Дарахтларни керакли минерал ўғитлар билан вақтида озиқлантириб туради, ерни юмшатиб, зараркунандаларга қарши кураш ишларини ҳам ўз вақтида амалга оширади.

Бугунги кунда Ҳамро Ражабов туманимиз аҳолисини хавфсиз ҳамда арзон озиқ-овқат маҳсулотлари билан таъминлашга, нарх-наво барқарорлигига ҳамда туман иқтисодиётининг гуллаб-яшнашига муносиб ҳисса қўшиб келмоқда.

Қишлоқ хўжалигининг боғдорчилик йўналиши бўйича ўзининг тадбиркорлик фаолиятини олиб бораётган Ҳамро Ражабов маҳалладошларига ўрнак ва намунадир.

Азалдан ота-боболаридан меърос қолган меҳнаткашлик ва оқкўнгиллик, ростгўйлик ва сахийлик фазилатлари туфайли у бугун маҳалладошлари орасида алоҳида ҳурматга ва эътиборга эга.

Боғбонга ҳосили мўл бўлишини ва яна узоқ йиллар халқимизни сархил мевалар ва манзарали дарахтлар кўчатлари билан таъминлашда давом этишини, қилган меҳнатларининг роҳатини кўриш насиб қилишини тилаймиз!

Ф. Эшимбетова