Qilichboylik mohir bogʻbon

Ota-bobolarimiz “Yaxshidan bogʻ qoladi” – deb bekorga aytishmagan. Ekilgan har bir niholda insonning qalb-qoʻridagi butun mehri, mehnati mujassam boʻladi. Ekilgan oʻsha nihollar vaqtlar oʻtib, mevali yoki manzarali daraxtga aylanadi. U bogʻbonga toʻkin meva-chevalar hadiya etib, daromad manbaiga aylanish bilan birga xalqimiz dasturxoni toʻkin boʻlishini taʼminlaydi.

Yer bilan tillashib, uning barcha sir-asrorlaridan xabardor boʻlgan amudaryolik Hamro Rajabov mana 8-yildirki, bogʻdorchilik bilan shugʻullanib keladi.

Rajabovlar oilasining saʼy-harakatlari bilan tumanizning olis hududlaridan biri − Qilichboy ovulida fayzli va koʻrkam bogʻ yaratilgan. Umumiy yer maydoni 40 sotixni tashkil qiluvchi ushbu bogʻda ayni kunlarda sarxil mevalar pishib yetilib, manzarali daraxtlar koʻkka boʻy choʻzgan. Bogʻbon bogʻdagi har bir daraxtga oʻzgacha mehr beradi, asrab-avaylaydi, parvarish qiladi. Oʻz navbatida dehqon ham yerdan va bogʻdan moʻl hosil olib, farovon turmush kechirmoqda.

Hamro Rajabov har yili 10 ming tupdan ortiq koʻchatlar yetishtirib, hamqishloqlarini hamda tumanimizning turli hududlarida istiqomat qiluvchi aholini sifatli va hosildor koʻchatlar bilan taʼminlab keladi. Bogʻda olma, uzum, shaftoli, oʻrik, anjir, anor, umuman jannatmakon yurtimizda yetishtiriladigan koʻpchilik mevalarning turli navlari bor.

Bogʻbon ushbu koʻrkam va fayzli bogʻ orqasidan har yili 50 mln. soʻmdan ortiq daromad koʻradi. Bugungi kunda mevali va manzarali daraxtlardan payvandlash orqali yetishtirilgan koʻchatlar, mevali daraxtlardan olingan hosil oila iqtisodiyoti barqarorligiga xizmat qilib kelmoqda.

Bogʻbon Hamro Rajabov topilgan daromad ortidan farzandlarini oʻqitgani, uyli-joyli qilgani, yengil avtomobillar sohibi boʻlganini mamnuniyat bilan eʼtirof etadi. 80 tup oʻrik, 20 tup olma, 200 tup shaftolini parvarish qilish, undan olinadigan hosilni nest-nobud qilmay yigʻib-terib olish katta mehnat, tajriba hamda masʼuliyat talab etadi.

Bogʻning yanada gullab-yashnashi uchun bogʻbon har bir agrotexnik tadbirni kechiktirmasdan, oʻz vaqtida hamda maromiga yetkazib bajaradi. Daraxtlarni kerakli mineral oʻgʻitlar bilan vaqtida oziqlantirib turadi, yerni yumshatib, zararkunandalarga qarshi kurash ishlarini ham oʻz vaqtida amalga oshiradi.

Bugungi kunda Hamro Rajabov tumanimiz aholisini xavfsiz hamda arzon oziq-ovqat mahsulotlari bilan taʼminlashga, narx-navo barqarorligiga hamda tuman iqtisodiyotining gullab-yashnashiga munosib hissa qoʻshib kelmoqda.

Qishloq xoʻjaligining bogʻdorchilik yoʻnalishi boʻyicha oʻzining tadbirkorlik faoliyatini olib borayotgan Hamro Rajabov mahalladoshlariga oʻrnak va namunadir.

Azaldan ota-bobolaridan meʼros qolgan mehnatkashlik va oqkoʻngillik, rostgoʻylik va saxiylik fazilatlari tufayli u bugun mahalladoshlari orasida alohida hurmatga va eʼtiborga ega.

Bogʻbonga hosili moʻl boʻlishini va yana uzoq yillar xalqimizni sarxil mevalar va manzarali daraxtlar koʻchatlari bilan taʼminlashda davom etishini, qilgan mehnatlarining rohatini koʻrish nasib qilishini tilaymiz!

F. Eshimbetova