“Нўғай эшон” жомъе масжидининг янги биноси қурилишига илк ғишт қўйилди
Масжид – мўъмин-мусулмонлар учун ибодат масканидир. Руҳий озуқа оладиган ва ўзаро биродарлик ришталарини мустаҳкам боғлайдиган масжидларнинг бунёд этилиши, мавжудларининг таъмирланиб, ибодат қилувчилар учун қулай ҳолатга келтирилиши юртдошларимизнинг айни кўнглидаги ишлардир.
Маърифат ва руҳий тарбия маскани ҳисобланмиш масжидларнинг Амударё туманида ҳам бунёд этилаётгани барча учун қувонарли, албатта.
Шу йилнинг 30 июлида туманнинг Чойкўл овули аҳолиси ҳаётида унутилмас воқеа бўлди: ҳудуддаги иморати эскириб, бугунги кун талабларига жавоб бермай қолган “Нўғай эшон” жомъе масжидининг янги биноси қурилишига тамал тоши қўйилган, тегишли ташкилотлар рухсатномаси асосида масчид биносини қайтадан бунёд этиш ишлари бошланган эди.
Пойдевори битказилган бино деворига илк ғиштни шу куни туманимизга хизмат сафари билан ташриф буюрган Қорақалпоғистон мусулмонлари қозиёти қозиси Шамсиддин Бахаўаддинов қўйиб берди ва масжид қуриш, уни обод масканга айлантиришнинг қанчалик улуғ савоб иш эканлигини таъкидлади.
Тадбирда иштирок этган туман бош имом-хатиби Абдураҳман Матсафоев ва бошқалар янги масжид биносининг барча мўъмин-мусулмонларга ҳидоят тарқатувчи, ёшлар маърифатининг юксалишига ҳисса қўшадиган қутлуғ даргоҳ бўлишини таъкидладилар ва масжид қурилишида ишлаётган, қурилишга беминнат моддий ёрдам бераётган инсонларга улкан миннатдорчилик билдиришди.
Масжид биноси қурилишига илк ғишт қўйиш маросимида туманимиз уламолари, маҳалла фаоллари, нуроний отахонлар ва кенг жамоатчилик вакиллари иштирок этдилар.
Тадбирда чойкўллик нуронийлар ҳам сўзга чиқиб, масжид биноси қайта қурилиши мўъмин-мусулмонларнинг ибодат қилишларига қулай шароит яратиши ва маърифат масканига айланишига замин бўлишини таъкидладилар, бунингдек савобли ишга фатво берган мутасадди ташкилотларга миннатдорчилик билдирдилар.
Мустақиллик туфайли юртимизда муқаддас ислом динимизга эмин-эркин эътиқод қилиш, жомъе масжидлари қуриш ва уларда жамоат бўлиб намоз ўқиш учун кенг имкониятлар яратилди. Фуқароларнинг бошқа ҳуқуқ-эркинликлари қатори виждон ва эътиқод эркинлигини таъминлашга алоҳида эътибор қаратилгани бугун ҳудудларда янги-янги масжидлар бинолари бунёд этилаётганида ҳам яққол намоён бўлаётир.
Чойкўл овулида янги меъморий услубда, миллий андозаларга мос қурилаётган масжид биноси ҳам замонавий технологиялар билан жиҳозланади халқимизнинг диний саводхонлигини оширишга, намоз ибодатларини қулай шароитларда адо этишига хизмат қилади.
Тадбир сўнгида барча иштирокчилар қурилаётган масжиднинг юртимиз мусулмонларига хайрли бўлишини, юртимизга тинчлик-осойишталик тилаб дуолар қилдилар.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
