“Noʻgʻay eshon” jomʼe masjidining yangi binosi qurilishiga ilk gʻisht qoʻyildi

Masjid – moʻʼmin-musulmonlar uchun ibodat maskanidir. Ruhiy ozuqa oladigan va oʻzaro birodarlik rishtalarini mustahkam bogʻlaydigan masjidlarning bunyod etilishi, mavjudlarining taʼmirlanib, ibodat qiluvchilar uchun qulay holatga keltirilishi yurtdoshlarimizning ayni koʻnglidagi ishlardir.

Maʼrifat va ruhiy tarbiya maskani hisoblanmish masjidlarning Amudaryo tumanida ham bunyod etilayotgani barcha uchun quvonarli, albatta.

Shu yilning 30-iyulida tumanning Choykoʻl ovuli aholisi hayotida unutilmas voqea boʻldi: hududdagi imorati eskirib, bugungi kun talablariga javob bermay qolgan “Noʻgʻay eshon” jomʼe masjidining yangi binosi qurilishiga tamal toshi qoʻyilgan, tegishli tashkilotlar ruxsatnomasi asosida maschid binosini qaytadan bunyod etish ishlari boshlangan edi.

Poydevori bitkazilgan bino devoriga ilk gʻishtni shu kuni tumanimizga xizmat safari bilan tashrif buyurgan Qoraqalpogʻiston musulmonlari qoziyoti qozisi Shamsiddin Baxaoʻaddinov qoʻyib berdi va masjid qurish, uni obod maskanga aylantirishning qanchalik ulugʻ savob ish ekanligini taʼkidladi.

Tadbirda ishtirok etgan tuman bosh imom-xatibi Abdurahman Matsafoyev va boshqalar yangi masjid binosining barcha moʻʼmin-musulmonlarga hidoyat tarqatuvchi, yoshlar maʼrifatining yuksalishiga hissa qoʻshadigan qutlugʻ dargoh boʻlishini taʼkidladilar va masjid qurilishida ishlayotgan, qurilishga beminnat moddiy yordam berayotgan insonlarga ulkan minnatdorchilik bildirishdi.

Masjid binosi qurilishiga ilk gʻisht qoʻyish marosimida tumanimiz ulamolari, mahalla faollari, nuroniy otaxonlar va keng jamoatchilik vakillari ishtirok etdilar.

Tadbirda choykoʻllik nuroniylar ham soʻzga chiqib, masjid binosi qayta qurilishi moʻʼmin-musulmonlarning ibodat qilishlariga qulay sharoit yaratishi va maʼrifat maskaniga aylanishiga zamin boʻlishini taʼkidladilar, buningdek savobli ishga fatvo bergan mutasaddi tashkilotlarga minnatdorchilik bildirdilar.

Mustaqillik tufayli yurtimizda muqaddas islom dinimizga emin-erkin eʼtiqod qilish, jomʼe masjidlari qurish va ularda jamoat boʻlib namoz oʻqish uchun keng imkoniyatlar yaratildi. Fuqarolarning boshqa huquq-erkinliklari qatori vijdon va eʼtiqod erkinligini taʼminlashga alohida eʼtibor qaratilgani bugun hududlarda yangi-yangi masjidlar binolari bunyod etilayotganida ham yaqqol namoyon boʻlayotir.

Choykoʻl ovulida yangi meʼmoriy uslubda, milliy andozalarga mos qurilayotgan masjid binosi ham zamonaviy texnologiyalar bilan jihozlanadi xalqimizning diniy savodxonligini oshirishga, namoz ibodatlarini qulay sharoitlarda ado etishiga xizmat qiladi.

Tadbir soʻngida barcha ishtirokchilar qurilayotgan masjidning yurtimiz musulmonlariga xayrli boʻlishini, yurtimizga tinchlik-osoyishtalik tilab duolar qildilar.

Oygul Rajabova