“Ўқитувчиларни янги замонавий методларга ўргатиш” мавзусида семинар-тренинг бўлиб ўтди

2021-2022 ўқув йилида Халқ таълими Вазирлиги томонидан ўқитувчилар салоҳиятини янада юксалтириш мақсадида янги ўқув методикаси ишлаб чиқилди. Ушбу ўқув методикасида замонавий методларларни дарс жараёнига тадбиқ этиш, баҳолаш тизимида эътибор қаратилиши лозим бўлган жиҳатлар, дарс жараёнини ташкил этишнинг интерактив усуллари, ўқувчини мустақил фикрлашга, изланишга ундовчи машқлар ва дидактик ўйинлар ҳақида кенг турда маълумотлар берилган.

13 сентябрь куни Амударё туманидаги 18-сонли умумтаълим мактабида янгидан жорий қилинган ўқув методикасини дарс жараёнига самарали тарзда жорий қилиш мақсадида семинар-тренинг бўлиб ўтди.

Семинарда Қорақалпоғистон Республикаси педагогларни янги методларга ўргатиш миллий маркази масъул ходимлари Абдуғаний Есназаров, Айзада Машарипова, Элла Суллетбаева ҳамда 18-сонли мактабнинг педагог-ўқитувчилари иштирок этишди.

Семинарда 18-сонли мактабнинг кимё фани ўқитувчиси Саётхан Бекимбетова ҳамда 16-сонли мактабнинг биология фани ўқитувчиси Наргиза Дўсимовалар тренерлик қилишди.

Семинар давомида тренерлар, замонавий илғор методикалар асосида дарс ўтишнинг инновацион усуллари ҳақида маълумот бердилар.

Жумладан, дарс жараёнида таълим олувчиларни янада фаоллаштирадиган методлар билан бойитиш, ўқув-материалини кичик-кичик бўлакларга бўлиб, уларнинг мазмунини очишда “Ақлий ҳужум”, “Кичик гуруҳларда ишлаш”, “Баҳс-мунозара”, “Муаммоли вазият”, “Йўналтирувчи матнли лойиҳа”, “Ролли ўйинлар” каби методларни қўллаш ва таълим олувчиларни амалий машқларни мустақил бажаришга ундаш каби масалаларга тўхтаб ўтилди.

Дарҳақиқат, ушбу интерфаол методлар қўлланилганда таълим берувчи таълим олувчини фаол иштирок этишга чорлайди. Ўқувчи бутун жараён давомида фаол иштирок этади.

Семинарда “Кичик гуруҳларда ишлаш”, “Дебатлар”, “Танқидий ташафаккур”, “Нуқтаи назаринг бўлсин”, “ҳар ким ҳар кимга ўргатади”, “Бинго”, “Бумеранг” методлари ҳақида кенг турда маълумотлар берилди ва амалда қўллаб кўрсатилди.

Айниқса, “Танқидий тафаккур” методининг авзаллиги, ўқитувчи қўйган масала ёки муаммони ўқувчи ўз фикрини баён қилиш, ўзгаларнинг фикрларини танқидий қайта идрок этиш, ўз нуқтаи назарини асослаб бериш ва сақлаб қолиш имкониятига эга бўлишига асосланишида намоён бўлади. Бу эса дарс жараёнининг қизиқарли ва самарали ташкил этилишида муҳим ўрин тутади.

Қолаверса, дидактик ўйинлар ва интерфаол методлар орқали ўқувчиларда ташкилотчи ва ташаббускор бўлиш, ўзаро бир-бирига ҳурмат, ҳайриҳоҳлик, ёрдам кўрсатиш, фаоллик, ижодкорлик каби ҳислатлар шаклланади.

Бугунги кунда таълим тизимида ўз ўзини тарбиялайдиган, мустақил изланувчан, ўзининг шахсий фикрига эга ўқувчиларни тарбиялаш муҳим вазифа ҳисобланади. Шу маънода, таълим тизимига тадбиқ этиладиган мазкур методлар ана шу мақсад ва вазифаларни амалга оширишга яқиндан ёрдам бериши билан аҳамиятлидир.

 Туман ҳокимлигининг Ахборот хизмати.