“Oʻqituvchilarni yangi zamonaviy metodlarga oʻrgatish” mavzusida seminar-trening boʻlib oʻtdi

2021-2022 oʻquv yilida Xalq taʼlimi Vazirligi tomonidan oʻqituvchilar salohiyatini yanada yuksaltirish maqsadida yangi oʻquv metodikasi ishlab chiqildi. Ushbu oʻquv metodikasida zamonaviy metodlarlarni dars jarayoniga tadbiq etish, baholash tizimida eʼtibor qaratilishi lozim boʻlgan jihatlar, dars jarayonini tashkil etishning interaktiv usullari, oʻquvchini mustaqil fikrlashga, izlanishga undovchi mashqlar va didaktik oʻyinlar haqida keng turda maʼlumotlar berilgan.

13-sentyabr kuni Amudaryo tumanidagi 18-sonli umumtaʼlim maktabida yangidan joriy qilingan oʻquv metodikasini dars jarayoniga samarali tarzda joriy qilish maqsadida seminar-trening boʻlib oʻtdi.

Seminarda Qoraqalpogʻiston Respublikasi pedagoglarni yangi metodlarga oʻrgatish milliy markazi masʼul xodimlari Abdugʻaniy Yesnazarov, Ayzada Masharipova, Ella Sulletbayeva hamda 18-sonli maktabning pedagog-oʻqituvchilari ishtirok etishdi.

Seminarda 18-sonli maktabning kimyo fani oʻqituvchisi Sayotxan Bekimbetova hamda 16-sonli maktabning biologiya fani oʻqituvchisi Nargiza Doʻsimovalar trenerlik qilishdi.

Seminar davomida trenerlar, zamonaviy ilgʻor metodikalar asosida dars oʻtishning innovatsion usullari haqida maʼlumot berdilar.

Jumladan, dars jarayonida taʼlim oluvchilarni yanada faollashtiradigan metodlar bilan boyitish, oʻquv-materialini kichik-kichik boʻlaklarga boʻlib, ularning mazmunini ochishda “Aqliy hujum”, “Kichik guruhlarda ishlash”, “Bahs-munozara”, “Muammoli vaziyat”, “Yoʻnaltiruvchi matnli loyiha”, “Rolli oʻyinlar” kabi metodlarni qoʻllash va taʼlim oluvchilarni amaliy mashqlarni mustaqil bajarishga undash kabi masalalarga toʻxtab oʻtildi.

Darhaqiqat, ushbu interfaol metodlar qoʻllanilganda taʼlim beruvchi taʼlim oluvchini faol ishtirok etishga chorlaydi. Oʻquvchi butun jarayon davomida faol ishtirok etadi.

Seminarda “Kichik guruhlarda ishlash”, “Debatlar”, “Tanqidiy tashafakkur”, “Nuqtai nazaring boʻlsin”, “har kim har kimga oʻrgatadi”, “Bingo”, “Bumerang” metodlari haqida keng turda maʼlumotlar berildi va amalda qoʻllab koʻrsatildi.

Ayniqsa, “Tanqidiy tafakkur” metodining avzalligi, oʻqituvchi qoʻygan masala yoki muammoni oʻquvchi oʻz fikrini bayon qilish, oʻzgalarning fikrlarini tanqidiy qayta idrok etish, oʻz nuqtai nazarini asoslab berish va saqlab qolish imkoniyatiga ega boʻlishiga asoslanishida namoyon boʻladi. Bu esa dars jarayonining qiziqarli va samarali tashkil etilishida muhim oʻrin tutadi.

Qolaversa, didaktik oʻyinlar va interfaol metodlar orqali oʻquvchilarda tashkilotchi va tashabbuskor boʻlish, oʻzaro bir-biriga hurmat, hayrihohlik, yordam koʻrsatish, faollik, ijodkorlik kabi hislatlar shakllanadi.

Bugungi kunda taʼlim tizimida oʻz oʻzini tarbiyalaydigan, mustaqil izlanuvchan, oʻzining shaxsiy fikriga ega oʻquvchilarni tarbiyalash muhim vazifa hisoblanadi. Shu maʼnoda, taʼlim tizimiga tadbiq etiladigan mazkur metodlar ana shu maqsad va vazifalarni amalga oshirishga yaqindan yordam berishi bilan ahamiyatlidir.

 Tuman hokimligining Axborot xizmati.