ФАХРИЙ ЖУРНАЛИСТ САЪДУЛЛА ХЎЖАНИЁЗОВНИНГ ЯНГИ КИТОБИ МУХЛИСЛАРГА ТАҚДИМ ЭТИЛДИ
Қорақалпоғистонда хизмат кўрсатган журналист, устоз Саъдулла Хўжаниёзовнинг "Кўрганларим, эшитганларим" китоби яқиндагина нашрдан чиқди. Ушбу тўпламда устозимизнинг умри мобайнида ўзи гувоҳи бўлган воқеалар, образлар ва хотиралардан иборат фардлари, ҳикоялари ва шеърлари ўрин олган. Асар қаламкашнинг кўрганлари, билганлари ва эшитганлари асосида яралган.
Яқинда "Тараққиёт кўзгуси" газетаси таҳририятида мазкур тўпламнинг тақдимот маросими бўлиб ўтди. Тадбирда болалар адабиёти бўйича назариётчи олим, педагогика фанлари доктори, профессор Сафо Матжон, "Тараққиёт кўзгуси" газетаси бош муҳаррири Ғуломжон Ешниёзов, журналистлар Робия Йўлдошева, Ойгул Ражабова, Озода Худойбергановалар ҳамда тумандаги бир қатор ижодкорлар иштирок этишди. Тақдимотда дастлаб олим Сафо Матжон сўзга чиқиб, ижодкорни янги китоби билан табриклади ва Саъдулла Хўжаниёзовнинг серқирра ижоди ҳақида сўз юритиб, шеърларидан самимийлик, ёшлик, муҳаббат руҳи уфуриб турганини айтиб ўтди.
Шундан сўнг, йиғилганлар китобдан ўрин олган фардларнинг мазмуни, қаламкашнинг талабалик йилларини хотирлаб ёзган ҳикояларининг моҳиятини таҳлил қилишди. Тақдимотда қатнашаётган журналистлар Ойгул Ражабова, Робия Йўлдошева ҳамда Озода Худойбергановалар ҳам сўзга чиқиб, устознинг кейинги ижодий фаолиятига куч-ғайрат, янги-янги ижод намуналари яралишида илҳом асло тарк этмаслигини тилашди ва аввалги китоблари каби ушбу китоб ҳам ўз мухлисларига эга бўлишини таъкидлашди.
"Кўрганларим, эшитганларим" китобининг ташқи муқовасида сахий куз манзараси акс этган. Бу эса ижодкор умрининг айни палласига мос келади. Аммо бугун саксон билан юзлашган устоз Саъдулла Хўжаниёзовнинг қалбидан, ижодидан ҳамиша баҳор нафаси уфуриб туради. Ишонамизки, ижодкор бундан илҳомланиб, мухлисларига янгидан-янги ижод намуналарини тақдим қилишда давом этади.
Азиза МАДРАҲИМОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
