FAXRIY JURNALIST SAʼDULLA XOʻJANIYoZOVNING YaNGI KITOBI MUXLISLARGA TAQDIM ETILDI

Qoraqalpogʻistonda xizmat koʻrsatgan jurnalist, ustoz Saʼdulla Xoʻjaniyozovning "Koʻrganlarim, eshitganlarim" kitobi yaqindagina nashrdan chiqdi. Ushbu toʻplamda ustozimizning umri mobaynida oʻzi guvohi boʻlgan voqealar, obrazlar va xotiralardan iborat fardlari, hikoyalari va sheʼrlari oʻrin olgan. Asar qalamkashning koʻrganlari, bilganlari va eshitganlari asosida yaralgan.

Yaqinda "Taraqqiyot koʻzgusi" gazetasi tahririyatida mazkur toʻplamning taqdimot marosimi boʻlib oʻtdi. Tadbirda bolalar adabiyoti boʻyicha nazariyotchi olim, pedagogika fanlari doktori, professor Safo Matjon, "Taraqqiyot koʻzgusi" gazetasi bosh muharriri Gʻulomjon Yeshniyozov, jurnalistlar Robiya Yoʻldosheva, Oygul Rajabova, Ozoda Xudoyberganovalar hamda tumandagi bir qator ijodkorlar ishtirok etishdi. Taqdimotda dastlab olim Safo Matjon soʻzga chiqib, ijodkorni yangi kitobi bilan tabrikladi va Saʼdulla Xoʻjaniyozovning serqirra ijodi haqida soʻz yuritib, sheʼrlaridan samimiylik, yoshlik, muhabbat ruhi ufurib turganini aytib oʻtdi.

Shundan soʻng, yigʻilganlar kitobdan oʻrin olgan fardlarning mazmuni, qalamkashning talabalik yillarini xotirlab yozgan hikoyalarining mohiyatini tahlil qilishdi. Taqdimotda qatnashayotgan jurnalistlar Oygul Rajabova, Robiya Yoʻldosheva hamda Ozoda Xudoyberganovalar ham soʻzga chiqib, ustozning keyingi ijodiy faoliyatiga kuch-gʻayrat, yangi-yangi ijod namunalari yaralishida ilhom aslo tark etmasligini tilashdi va avvalgi kitoblari kabi ushbu kitob ham oʻz muxlislariga ega boʻlishini taʼkidlashdi.

"Koʻrganlarim, eshitganlarim" kitobining tashqi muqovasida saxiy kuz manzarasi aks etgan. Bu esa ijodkor umrining ayni pallasiga mos keladi. Ammo bugun sakson bilan yuzlashgan ustoz Saʼdulla Xoʻjaniyozovning qalbidan, ijodidan hamisha bahor nafasi ufurib turadi. Ishonamizki, ijodkor bundan ilhomlanib, muxlislariga yangidan-yangi ijod namunalarini taqdim qilishda davom etadi.

Aziza MADRAHIMOVA.