Бугун туманнинг 6 та ҳудудида янги спорт майдончалари фойдаланишга топширилди
Маълумки, муҳтарам Президентимизнинг ташаббуси билан ёшларнинг бўш вақтини мазмунли ўтказиш ҳамда соғлом турмуш тарзини тарғиб қилиш, ёшларнинг ижтимоий фаоллигини ошириш мақсадида беш босқичли “Беш ташаббус олимпиадаси” ташкил этилган эди. Мазкур олимпиаданинг биринчи мавсуми 30 апрелдан бошлаб 1июнь кунига қадар давом этди. Унда Амударё тумани ёшлари ҳам фаол иштирок этиб, фахрли ўринларни эгалладилар.
Олимпиаданинг Республика босқичи ғолиблари қимматбаҳо совғалар билан биргаликда ўз маҳаллалари ҳудудига спорт майдончаси қуриб берилиши учун махсус сертификатларни қўлга киритишди.
Амударё туманида ҳам олимпиаданинг 1-мавсумида бир гуруҳ ёшлар Ўзбекистон Республикаси босқичида ғолиб бўлиб, ўз маҳаллаларига спорт майдончаси қуриб берилиши учун махсус сертификатларни қўлга киритишган эди.
Қисқа фурсатларда мазкур спорт майдончалари тўлиқ қуриб битказилди. 24 декабрь куни туманнинг 6 та ҳудудидаги мазкур спорт майдончаларининг очилиш маросими бўлиб ўтди. Унда туман ҳокими Султонбой Йўлдашев, секторлар раҳбарлари, ҳоким ўринбосарлари олимпиаданинг туман боскичи ғолиблари, ёшлар етакчилари ва туманнинг фаол ёшлари иштирок этишди.
Хитой овули ҳудудидаги спорт майдончасининг тантанали ўтган очилиш маросимида туман ҳокими Султонбой Йўлдашев мазкур олимпиаданинг 1-мавсумида ташкил этилган маънавий ва марифий ҳамда спорт тадбирларида туманимиздан жами 28 минг 898 нафар ёшлар фаол иштирок этишганини, шулардан 41 нафари Қорақалпоғистон Республикаси босқичида ғолибликни қўлга киритиб, Ўзбекистон Республикаси босқичида ҳам фаол иштирок қилишганини мамнуният билан эътироф этиб ўтди.
Санобар Шарифбоева Андижон вилоятида ўтказилган мусобақада спортнинг шашка тури бўйича фаол қатнашиб, маҳалласига мана шундай замонавий типдаги спорт майдончасининг қурилиши учун сертификатни қўлга киритди. Санобарнинг спортдаги ютуғи туфайли бугун Хитой овули ҳудудида кўркам спорт майдончаси бунёд этилди. Эндиликда мазкур майдончада спорт билан шуғуланган овул ёшлари орасидан ҳам янада кўплаган спортчилар етишиб чиқиши шубҳасиз.
Шу куни Заҳриддин Муҳаммад Бобур номли овулда жойлашган спорт майдончасининг ҳам очилиш маросими бўлиб ўтди.
Тадбирда туман ҳокими Султонбой Йўлдашев овул ҳудудига спорт майдончаси қуриб берилишига сабабчи бўлган маҳалланинг фаол ёшларидан бири Умида Ибрагимованинг Street Workout бўйича муваффақиятли қатнашиб, ғолиб бўлганлигини, эндиликда маҳалладаги ҳар бир ўсмир ушбу спорт майдончасида жисмоний салоҳиятини ошириш имкониятига эга бўлганлигини айтиб ўтди.
Тадбирда сўзга чиққанлар “Беш ташаббус олимпиадаси” кўплаб истеъдодли ёшларни кашф этаётганлигини, давлатимиз томонидан ёшларга қаратилаётган эътибор натижасида улар катта муваффақиятларга эришаётганликларини таъкидлаб ўтишди.
Тўлқин овули ҳудудидаги спорт майдончасининг очилиш маросимида туман ҳокими ўринбосарлари, фуқаролар йиғини масъуллари ва овул ёшлари иштирок этишди.
Очилиш маросимида сўзга чиққанлар олимпиаданинг 1-мавсуми якунларига кўра Республика босқичида ғолиб бўлган 6 нафар ёшларнинг маҳаллаларига спорт комплекслари қуриб берилганини, 2-мавсумда ҳам тумандан 3 нафар ёшлар 1-ўринни, 3 нафар ёшлар 3-ўринни эгаллаганлигини, 2023 йилда уларнинг ҳам маҳаллаларига спорт майдончалари қуриб берилишини мамнуният билан маълум қилишди.
Маҳаллаларда барпо этилган спорт майдончалари ёшларнинг бўш вақтларини мазмунли ташкил этиш ҳамда соғлом турмуш тарзига риояга этишлари учун муҳим восита бўлиб хизмат қилиши шубҳасиз. Достон Ҳайтбоев, Хурсанд Тилавмуродов, Амин Холбоев, Маҳмуд Жўллибоев, Шуҳрат Жўллибоев сингари интилувчан ёшларнинг спортнинг стритбол тури бўйича эришган ғалабалари сабаб Тўлқин овулида замонавий типдаги спорт майдончаси бунёд этилди.
Шу куни Манғит шаҳридаги Навоий маҳалласи ёшлари учун ҳам қувончли воқеа рўй берди. Янги йил арафасида мазкур маҳалла ҳудудида ҳам спорт майдончаси фойдаланишга топширилди.
Маълумот учун, “Беш ташаббус олимпиадаси”нинг 1-мавсумида маҳалла босқичига 18 минг 767 нафар, сектор босқичига 9 минг 359 нафар, туман босқичига 772 нафар ёшлар қамраб олинди.
Туманимиз ёшларидан 41 нафари Қорақалпоғистон Республикаси босқичида ғолибликни қўлга киритиб, Ўзбекистон Республикаси босқичида фаол иштирок қилишди. Ўзбекистон Республика босқичида 3 нафар ёшимиз 1-ўрин, 3 нафар ёшимиз 2-ўрин эгалладилар.
Ундан ташқари, “Ёш китобхон оила” йўналишида Дўрман овулида яшовчи Ўринбаевлар оиласи 1-ўрин соҳиби бўлиб, Президент совғаси − “Спарк” автомобилини қўлга киритишди.
Шунингдек, 24 декабрь куни туманнинг Бойовул маҳалласи ва Амир Темур номли овулларида ҳам шу каби майдончалар фойдаланишга топширилди.
Мусобақалар ғолиблари яшовчи маҳаллаларга спорт майдончаларининг қуриб берилгани нафақат уларга, балки мазкур ҳудудда яшовчи барча ёшларга рағбат бўлди.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
