АСКАР ЎҒЛИНИНГ ҚАРОРИДАН МАМНУН ОНА

Халқимизнинг қон-қонига сингиб кетган гўзал бир фазилати бор: янги оила қураётган ёшларга тўлиб-тошиб бахт-саодат тилаш билан бирга, албатта “униб-ўсинглар, бошларингизда соябон, атрофингизда метин қўрғон бўлгулик ўғиллар кўринглар”, – дейишади. Бу – ёш оиланинг она Ватан тинчлигига дахлдор жуфтлик сифатида эътироф этилишидир.

Манғит шаҳрининг Ойбек номли маҳалласида истиқомат қилувчи Музаффар Қўчқоров билан Дилдора Авезбоеваларнинг биргаликдаги ҳаёти ҳам ана шундай тилаклар билан бошланди. Ўзаро меҳр-оқибат, бир-бировга иззат-ҳурмат асосига қурилган оилада бири-биридан ширин икки ўғил дунёга келганида Музаффар билан Дилдоранинг қувончларига нафақат яқинлари, балки дўстлари, қўни-қўшнилари ҳам шерик бўлишди.

Йиллар билан бўй талашиб, улғайган ўғилларининг каттаси Нурбек отасига ёрдамчи бўлди, якка тадбиркорлик йўналишини танлади. Бегзод эса ўзи таълим олган 55-сонли мактабда ўқиб юрган кезлариданоқ ҳарбий бўлиш орзуси билан улғайди ва ҳарбийлар ҳаётига оид китобларни ўқиш, мактабдаги чақириққа қадар тайёргарлик фанини пухта ўзлаштириш унинг севимли машғулотига айланди. Ўқишдан бўш вақтларида мустақил равишда футбол спорти билан шуғулланди, чиниқиш машғулотларида қатнашди. 2022 йилнинг январь-февраль ойларида у муддатли ҳарбий хизматга чақирилган тенгқурлари қатори Амударё туман Мудофаа ишлари бўлими томонидан ташкил этилган тиббий, ахлоқий-маънавий, жисмоний етуклик бўйича кўриклардан ўтиб, маънавий-маърифий ва назарий синовларни муваффақиятли топширди. Март ойида муддатли ҳарбий хизмат бурчини адо этиш учун жўнаб кетди.

Андижон вилоятининг Пахтаобод тумани ҳудудидаги Давлат хавфсизлик хизмати чегара қўшинлари таркибида ўз хизмат бурчини адо этишга киришган Бегзод ўзининг қизиқувчанлиги, қолаверса, мустақил равишда футбол спорти ва жисмоний чиниқиш машқлари билан шуғуллангани учун ҳарбий ҳаётга жуда тез кўникди. Чаққонлиги ва кисм командирлари томонидан берилган топшириқларни аъло даражада бажариши билан қуролдош дўстларига намуна бўлаолди.

Муддатли ҳарбий хизмат бурчини адо этаётган барча сафдошлари қатори Бегзод Ўрозбоев ҳам айни кунларда ҳарбий-жисмоний ва назарий тест синовларини топширмоқда.

- Ўғлим синовлардан аъло даражада ўтаётган экан, - қувонч билан сўзлайди унинг онаси Дилдора Авезбоева. – Бегзоджон хизмат қилаётган ҳарбий қисмдан ташаккурномалар, “шундай фарзандни тарбиялаганингиз учун раҳмат”, - деган миннатдорчилик хатларини олганимда кўксим тоғдай юксалади. Бегзоджон ҳарбий хизматга жўнаб кетаётиб менга сўз берган: “албатта ҳарбий бўламан, она Ватанни ҳимоя қиламан!”, - деган!

Онанинг фарзандидан розилиги ҳам, фарзандига ишончи ҳам унинг мамнуният балқиб турган юз-у кўзларида аён. Дилдорахон ҳам Бегзоджоннинг танловидан, эришаётган ютуқларидан мамнун. Чунки Бегзоджон Ўрозбоев ўзи хизмат қилаётган давлат хавфсизлик хизмати чегара қўшинлари таркибидаги ҳарбий қисм қўмондонлигининг тавсияси, қолаверса, ўз ҳоҳиши билан муддатли ҳарбий хизмат бурчини ўтаб бўлгач, шартнома асосида хизматни давом эттиришга қарор қилган.

- Баҳор келишини интиқиб кутаяпмиз, - дейди Дилдорахон. – Бегзоджонни ҳарбий либосда кўриш она сифатида менга фахр-ифтихор бағишлайди. У ўзи орзу қилганидай она Ватан ҳимоячиси бўлиб, ҳарбий хизматни давом эттириш учун яна ўзи хизмат қилган қисмга жўнаб кетади. Илоҳим, ўғлим ва у каби барча Ватан ҳимоячилари омон бўлсинлар.

Биз ҳам аскар ўғлининг қароридан мамнун Дилдорахон Авезбоевага ва барча аскар оналарига соғлик, юртимизга тинчлик тилаймиз ҳамда 14 январь – Ватан ҳимоячилари куни билан муборакбод этамиз.

Робия ЙЎЛДОШЕВА, Рашан БАҲРОМОВ, М.ШОМУРОДОВ сурат-лавҳаси.