ASKAR OʻGʻLINING QARORIDAN MAMNUN ONA

Xalqimizning qon-qoniga singib ketgan goʻzal bir fazilati bor: yangi oila qurayotgan yoshlarga toʻlib-toshib baxt-saodat tilash bilan birga, albatta “unib-oʻsinglar, boshlaringizda soyabon, atrofingizda metin qoʻrgʻon boʻlgulik oʻgʻillar koʻringlar”, – deyishadi. Bu – yosh oilaning ona Vatan tinchligiga daxldor juftlik sifatida eʼtirof etilishidir.

Mangʻit shahrining Oybek nomli mahallasida istiqomat qiluvchi Muzaffar Qoʻchqorov bilan Dildora Avezboyevalarning birgalikdagi hayoti ham ana shunday tilaklar bilan boshlandi. Oʻzaro mehr-oqibat, bir-birovga izzat-hurmat asosiga qurilgan oilada biri-biridan shirin ikki oʻgʻil dunyoga kelganida Muzaffar bilan Dildoraning quvonchlariga nafaqat yaqinlari, balki doʻstlari, qoʻni-qoʻshnilari ham sherik boʻlishdi.

Yillar bilan boʻy talashib, ulgʻaygan oʻgʻillarining kattasi Nurbek otasiga yordamchi boʻldi, yakka tadbirkorlik yoʻnalishini tanladi. Begzod esa oʻzi taʼlim olgan 55-sonli maktabda oʻqib yurgan kezlaridanoq harbiy boʻlish orzusi bilan ulgʻaydi va harbiylar hayotiga oid kitoblarni oʻqish, maktabdagi chaqiriqqa qadar tayyorgarlik fanini puxta oʻzlashtirish uning sevimli mashgʻulotiga aylandi. Oʻqishdan boʻsh vaqtlarida mustaqil ravishda futbol sporti bilan shugʻullandi, chiniqish mashgʻulotlarida qatnashdi. 2022-yilning yanvar-fevral oylarida u muddatli harbiy xizmatga chaqirilgan tengqurlari qatori Amudaryo tuman Mudofaa ishlari boʻlimi tomonidan tashkil etilgan tibbiy, axloqiy-maʼnaviy, jismoniy yetuklik boʻyicha koʻriklardan oʻtib, maʼnaviy-maʼrifiy va nazariy sinovlarni muvaffaqiyatli topshirdi. Mart oyida muddatli harbiy xizmat burchini ado etish uchun joʻnab ketdi.

Andijon viloyatining Paxtaobod tumani hududidagi Davlat xavfsizlik xizmati chegara qoʻshinlari tarkibida oʻz xizmat burchini ado etishga kirishgan Begzod oʻzining qiziquvchanligi, qolaversa, mustaqil ravishda futbol sporti va jismoniy chiniqish mashqlari bilan shugʻullangani uchun harbiy hayotga juda tez koʻnikdi. Chaqqonligi va kism komandirlari tomonidan berilgan topshiriqlarni aʼlo darajada bajarishi bilan quroldosh doʻstlariga namuna boʻlaoldi.

Muddatli harbiy xizmat burchini ado etayotgan barcha safdoshlari qatori Begzod Oʻrozboyev ham ayni kunlarda harbiy-jismoniy va nazariy test sinovlarini topshirmoqda.

- Oʻgʻlim sinovlardan aʼlo darajada oʻtayotgan ekan, - quvonch bilan soʻzlaydi uning onasi Dildora Avezboyeva. – Begzodjon xizmat qilayotgan harbiy qismdan tashakkurnomalar, “shunday farzandni tarbiyalaganingiz uchun rahmat”, - degan minnatdorchilik xatlarini olganimda koʻksim togʻday yuksaladi. Begzodjon harbiy xizmatga joʻnab ketayotib menga soʻz bergan: “albatta harbiy boʻlaman, ona Vatanni himoya qilaman!”, - degan!

Onaning farzandidan roziligi ham, farzandiga ishonchi ham uning mamnuniyat balqib turgan yuz-u koʻzlarida ayon. Dildoraxon ham Begzodjonning tanlovidan, erishayotgan yutuqlaridan mamnun. Chunki Begzodjon Oʻrozboyev oʻzi xizmat qilayotgan davlat xavfsizlik xizmati chegara qoʻshinlari tarkibidagi harbiy qism qoʻmondonligining tavsiyasi, qolaversa, oʻz hohishi bilan muddatli harbiy xizmat burchini oʻtab boʻlgach, shartnoma asosida xizmatni davom ettirishga qaror qilgan.

- Bahor kelishini intiqib kutayapmiz, - deydi Dildoraxon. – Begzodjonni harbiy libosda koʻrish ona sifatida menga faxr-iftixor bagʻishlaydi. U oʻzi orzu qilganiday ona Vatan himoyachisi boʻlib, harbiy xizmatni davom ettirish uchun yana oʻzi xizmat qilgan qismga joʻnab ketadi. Ilohim, oʻgʻlim va u kabi barcha Vatan himoyachilari omon boʻlsinlar.

Biz ham askar oʻgʻlining qaroridan mamnun Dildoraxon Avezboyevaga va barcha askar onalariga sogʻlik, yurtimizga tinchlik tilaymiz hamda 14-yanvar – Vatan himoyachilari kuni bilan muborakbod etamiz.

Robiya YOʻLDOShEVA, Rashan BAHROMOV, M.ShOMURODOV surat-lavhasi.