ТИББИЁТ БИРЛАШМАСИ ҲАМШИРАЛАРИГА ПАТРОНАЖ СУМКАЛАРИ ТОПШИРИЛДИ
Бугунги кунда юртимизда репродуктив ёшдаги аёллар, ҳомиладорлар ва болаларга кўрсатиладиган тиббий ёрдам сифатини ошириш, кўламини янада кенгайтириш, тиббий хизматни самарали йўлга қўйиш каби мақсадларда муҳим чора-тадбирлар амалга оширилмоқда. Айниқса, бу борада катта аҳамият касб этаётган патронаж хизмати такомиллаштирилиб, қамровни янада яхшилаш, ҳамширалик ёрдамини кўрсатиш, тиббий маданиятни юксалтириш каби ишларнинг янгича мезон ва таъсирчан усуллари жорий этилмоқда.
22 февраль куни туман Тиббиёт бирлашмаси мажлислар залида тиббий хизмат сифатини яхшилаш борасида олиб борилаётган ишлар хусусида йиғилиш ўтказилди. Тиббиёт бирлашмаси раҳбари Фахриддин Абдуллаев томонидан ўтказилган мазкур йиғилишда туман ҳокими Султонбой Йўлдашев ҳам иштирок этди.
Йиғилишда туман ҳокими тиббиёт ходимлари, соҳа мутахассислари билан мулоқотда бўлиб, соғлиқни сақлаш тизимида олиб борилаётган ислоҳотлар, туманимиз аҳолисига кўрсатилаётган тиббий хизмат сифати, моддий-техник базани яхшилаш борасида амалга оширилаётган ишлар хусусида сўзлашди. Шунингдек, тиббий патронаж хизмати инсон саломатлигини асраш, касалликларнинг олдини олиш ва халқимиз саломатлигини муҳофазалашда муҳим ўрин тутишини алоҳида таъкидлаб ўтди.
Йиғилиш давомида сўзга чиққан соҳа масъуллари ҳам ушбу йўналишдаги ишлар талаб даражасида йўлга қўйилаётгани натижасида кўплаб тиббий-ижтимоий муаммоларнинг олди олинаётгани, касалликларни кескин камайтириш, жамиятда соғлом турмуш тарзини қарор топтиришда муҳим аҳамият касб этаётгани тўғрисида кенг тўхталиб ўтишди.
Таъкидланганидек, бугунги кунда тиббиёт ходимлари томонидан ҳудуд аҳолиси ҳар олти ойда хатловдан ўтказилмоқда. Унда аҳоли орасида патронаж кўмагига эҳтиёжманд қатлам аниқлаб олиниб, патронаж ҳамшира, умумий амалиёт шифокори ва тор мутахассислар иштирокида хонадонларда мақсадли патронаж тадбирлари ташкил этилмоқда. Унда патронаж парваришга муҳтож ёлғиз қариялар, ногиронлар ва ўзгалар парваришига муҳтож шахслар, 1 ёшгача ва ногирон болалар, ҳомиладорлар, янги туққан оналар патронаж билан қамраб олинмоқда. Аниқланган беморларни эса касаллигига қараб, амбулатор ёки стационар шароитда тумандаги тиббиёт муассасасида даволаш чоралари кўрилмоқда.
Йиғилишда шу каби маълумотлар берилганидан сўнг, Президентимизнинг “Бирламчи тиббий-санитария ёрдамини аҳолига яқинлаштириш ва тиббий хизматлар самарадорлигини ошириш бўйича қўшимча чора-тадбирлар тўғрисида”ги Қарори ҳамда аҳолига кўрсатилаётган бирламчи тиббий-санитария ёрдамининг, тиббиёт ходимларини қўллаб-қувватлаш ва фаолият самарадорлигини ошириш бўйича чора-тадбирлар Дастурига асосан маҳаллий бюджет ҳисобидан 50 нафар патронаж ҳамшираларга тиббиёт сумкалари топширилди. Тиббиёт сумкаларини қабул қилиб олган патронаж ҳамширалар Президентимиз ва туман ҳокимига соғлиқни сақлаш соҳасига қаратаётган эътиборлари учун миннатдорчилик билдирдилар. Ўзларига топиширилган вазифаларни сидқидилдан бажаришга ва патронаж тиббий хизмати сифатини янада яхшилашга, беморларнинг тиббиёт ходимларидан розилигига эришишга бор куч ва билимларини сарф этишга тайёр эканликларини айтдилар.
Таъкидлаш жоизки, тиббий маданият даражасининг юқори бўлишида патронаж ҳамшираларнинг ўрни беқиёс. Бугунги кунда ўрта тиббиёт ходимларини иш қуроллари билан таъминлаш, меҳнатини енгиллаштириш борасида амалга оширилаётган бу каби ишлар ҳамшираларнинг иштиёқини ошириб, тиббий хизмат сифатини янада яхшилашга хизмат қилади.
Ж.Явкашев, туман ТТБ ташкилий-услубий бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
