ФИДОЙИ МЕҲНАТЛАР САМАРАСИ

Умумий ўрта таълим муассасаларида ўқувчиларни миллий ва умуминсоний қадриятлар руҳида тарбиялаш муҳитини яратишда, миллий одоб-ахлоқ меъёрларини тарбия жараёнига татбиқ этишда, ўқувчилар кўнглида она Ватанга, буюк аждодларимиз мероси ва халқимизнинг бугунги бунёдкорлик ишларига юксак эҳтиром туйғуларини сингдиришда мактаб директорларининг маънавий ва маърифий тарбия ишлари бўйича ўринбосарларининг зиммасидаги вазифалар жуда салмоқли. Шунингдек, у ўқитувчилар жамоасида ҳам билимдонлиги, инсоний фазилатлари билан барчага ўрнак бўла олиши лозим. Педагогик жамоада соғлом ижодий муҳитни ярата олиши, илғор ўқитувчиларни ўз вақтида рағбатлантириб, янада самарали ишлашга ундаши муассасада таълим сифати ошишига замин бўлади.

Асосий кўрсаткичларига кўра яшил тоифага кирувчи туманимиздаги 26-сонли умумий ўрта таълим мактабининг маънавий-маърифий ишлар бўйича директор ўринбосари Ҳамида Артикова жонкуяр ўқитувчи, хизмат лавозимини сидқидилдан адо этиб келаётган таълим фидойиларидан биридир.

У ўрта мактабни тугатиб 1998-2002 йилларда Қорақалпоқ давлат университетининг биология факультетида ўқиди. Ўқитувчилик фаолиятини Манғит шаҳридаги 38-сонли мактабда биология фани ўқитувчиси бўлиб ишлашдан бошлади. 2005 йилдан ҳозирги кунгача 26-сонли мактабнинг маънавий-маърифий ишлар бўйича директор ўринбосари бўлиб ишлаб келмоқда.

Мазкур муассасада ҳозирги кунда 44 нафар маҳоратли ўқитувчилар 21 синфда 470 нафар ўқувчиларга таълим-тарбия беришаяпти.

Ўқитувчиларнинг ўз билимини ошириш, замонавий методлар асосида фан асосларини чуқур ўргатишга интилиши туфайли мактаб тумандаги дарс самарадорлиги юқори таълим муассасаларидан бирига айланди. Ўтган ўқув йилида мактабнинг 11-синфини тугатган 42 нафар битирувчиларнинг 22 нафари республикамиздаги турли олийгоҳлар талабалари бўлишгани, турли кўрик-танловлар билимлар беллашувлари фанлар олимпиадаларида ўқувчиларининг юқори ўринларни эгаллаётгани ўқитувчилар, ўқувчилар орасида соғлом маънавий муҳит барқарорлигидан, педагогик жамоанинг фидойилигидан далолат беради.

Жорий ўқув йилида ҳам мактаб ўқувчилари қувонарли ютуқларни қўлга киритишаяпти. Мактабнинг 11-синф ўқувчиси Нуршода Саъдуллаева инглиз тилидан халқаро, Шоҳида Нуруллаева математика фанидан миллий сертификат олишга муяссар бўлишди.

Ҳамиданинг таълимга жонкуярлиги бежиз эмас. Унинг оиласини педагоглар оиласи, десак адашмаган бўламиз. Унинг қайнонаси Машариф Мадраҳимов, қайнонаси Норжон Йўлдошевалар мазкур мактабда ўқитувчилик қилиб, пенсияга чиқишган, турмуш ўртоғи Собиржон Мадраҳимов ҳам ўқитувчи, Ҳамидага тоғдай суянч, ҳамфикр, ҳамқадам.

Ҳамида Артикова Собиржон билан ўғли, икки нафар қизини ҳам одобли, илмли, интилувчан қилиб вояга етказишаяпти. Ҳали мактаб ўқувчилари бўлган Фахриддин, Ферузабону, Шаҳнозабонуларнинг ҳам илмда эришаётган ютуқлари кўп.

Фахриддин кимё, фанидан фанлар олимпиадасида туманда 1-ўринни олиб, Қорақалпоғистон республикаси босқичида қатнашди.

Маънавият ва таълим фидойиси Ҳамида Артикованинг кейинги ишларида ҳам муваффақиятлар тилаб қоламиз.

Ойгул РАЖАБОВА.