“Янги Конституция− халқ дардига қулоқ солувчи давлат асоси!" шиори остида тарғибот тадбири бўлиб ўтди

Айни кунларда мамлакатимиз бўйлаб умумхалқ Референдуми олдидан “Янги Конституция − халқ дардига қулоқ солувчи давлат асоси!” шиори остида тарғибот тадбирлари, концерт дастурлари ўтказилмоқда. Уларда жамоат арбоблари, эстрада юлдузлари, спортчилар, давлат идоралари вакиллари, тадбиркорлар, иқтидорли ёшлар чиқиш қилмоқда.

Мана шундай тарғибот тадбири Амударё туманида ҳам ўтказилди.

10 апрел куни туманнинг чекка ҳудудларидан бири бўлган Холимбег овули ҳудудида жойлашган 35-сонли мактабда янгиланаётган Конституция тарғиботига бағишланган тадбир бўлиб ўтди. Унда республика ишчи гуруҳ азолари- “Оила ва хотин-қизлар” илмий тадқиқот институти директори ўринбосари, педагогика фанлари доктори, профессор Ойниса Мусурманова, Тошкент ирригация ва қишлоқ хўжалигини механизациялаш, муҳандислари институти миллий тадқиқот университети профессори, педагогика фанлари доктори З.Исмаилова, Ўзбекситон давлат санъат ва маданият институти педагогика ва психология кафедраси мудири М.Абдужаббарова, иқтидорли ёшлар, педагог ходимлар, фаол аёл-қизлар ҳамда  маҳалла аҳли иштирок этишди.

Тадбирда ишчи гуруҳ азоси, “Оила ва хотин-қизлар” илмий тадқиқот институти директори ўринбосари, педагогика фанлари доктори, профессор Ойниса Мусурманова маъруза қилди.
У янгиланаётган Конституциявий қонун лойиҳаси матнининг 50- ва 52-моддаларида мактаб  ва мактабгача таълимни ривожлантириш бўйича қатор ҳуқуқий асослар келтириб ўтилганини қайд этиб, 30 апрелm куни барчани ўз келажагимиз ва ҳақ-ҳуқуқларимиз кафолати учун овоз беришга чақирди.

Шундан сўнг, Қорақалпоғистон Республикаси Вазирлар Кенгаши Раиси ўринбосари Марям Аҳмедова Янгиланаётган Конституция мамлакат ривожи, аҳолининг тинч ва фаровон турмуш кечириши, юртнинг тараққий этиши учун муҳим ҳуқуқий асос эканини таъкидлаб ўтди. Янгиланаётган Конституцияда давлат тузилиши, ҳокимият ва бошқарув органлари тизими, уларнинг ваколат ҳамда мажбуриятлари, шакллантирилиш тартиби, сайлов тизими, фуқароларнинг ҳуқуқ ва эркинликлари, жамият ва шахснинг ўзаро муносабатлари, шунингдек, суд тизими ҳамда давлат ва жамиятнинг ўзаро муносабатлари янада аниқ ва равшан белгилаб берилгани алоҳида эътироф этилди.

Тадбирда "Мўтабар аёл" кўкрак нишони соҳибаси, "Оқила аёллар" ҳаракати аъзоси Амина Юсупова ҳам сўз олиб янги таҳрирдаги Конституциявий Қонун лойиҳасида алоҳида боб оила, болалар ва ёшлар масаласига бағишланганлигини айтиб ўтди. Ва ушу боб ичидаги моддаларда оилавий қадриятлар янада мустаҳкамланганидан мамнун эканлигини билдириб ўтди.    

Тадбир давомида “Зулфия” номидаги Давлат мукофоти соҳибаси Барно Самандарова Конституциямизнинг 44-моддасида мажбурий меҳнат, болаларнинг баркамол ривожланишига салбий таъсир қиладиган ҳар қандай болалар меҳнати тақиқланаётганини таъкидлади. У ўз нутқида 30 апрел кунги Референдумда тенгдошларининг ва ўзининг ҳақ-ҳуқуқлари мустаҳкам кафолатлаб қўйилаётган Янгиланаётган Конституциямизга овоз беришини таъкидлади ва ёшларни ҳам шунга чорлади.

Тарғибот тадбирида Холимбег овулидаги мактабгача таълим муассаси тарбияланувчилари, 17-, 35-сонли мактабларнинг иқтидорли ўқувчилари томонидан она Ватан, тинчлик ва дўстликни тараннум этувчи гўзал куй-қўшиқлар ижро этилди.

Туман ҳокимлигининг Ахборот хизмати