МАҲОРАТЛИ МУСИҚА ЎҚИТУВЧИСИ

Чолғу ижрочилигида педагогик фаолият олиб бораётган устозларнинг иши мураккаб жараён ҳисобланади. Мусиқа мактабларида ўқувчиларнинг психологияси, қобилияти ва истеъдодини чуқур ўрганган ҳолда ижро дастурини танлаш ва унга жалб қилиш яхшигина тажриба талаб қилади. Масъулиятли касб эгаси, туманимиздаги 21-сонли Болалар мусиқа ва санъат мактаби ўқитувчиси Комилжон Муротов бу борада 40 йиллик катта тажриба эга маҳоратли устозлардандир.

У 1965 йилда туғилган. Мактаб таълимидан сўнг, 1980-1984 йилларда Жапақ Шомуратов номидаги Нукус давлат санъат билим юртини тугатган. 1987-1992 йилларда А.Қодирий номидаги Тошкент давлат Маданият институти (ҳозирги Ўзбекистон давлат санъат ва маданият институти)да олий таълим олган. Олийгоҳни тугатгач, 1984-1998 йилларда Ҳамза номидаги Болалар мусиқа ва санъат мактабида прима рубоби бўйича ўқитувчи бўлиб ишлаган. 1998-2015 йилларда туманнинг 21-сонли Болалар мусиқа ва санъат мактабида ишлай бошлади.

Комилжон Муратов ўз иш фаолияти давомида самарали меҳнати учун бир неча бор Қорақалпоғистон Республикаси маданият вазирлиги, туман ҳокимлигининг Фахрий ёрлиқлари билан тақдирланган.

– Комилжон Муротов бугунги кунда ўзининг ижрочилик маҳорати ва ўқитувчилик услуби билан алоҳида ажралиб турадиган тажрибали мутахассислардан бири, – дейди “Қорақалпоғистонда хизмат кўрсатган маданият ходими”, биринчи даражали Меҳнат фахрийси, Халқ таълими аълочиси Гулмирза Нурматов. – У Қорақалпоғистон мусиқа маданиятига улкан ҳисса қўшмоқда.

Тинимсиз изланишдан ва меҳнат қилишдан тўхтамайдиган Комилжон Муротовнинг шогирдларидан Х.Ваисов ва Ў.Жуманиёзовлар устоз йўлини давом эттириб, педагог сифатида иш фаолиятини олиб бормоқдалар. Хурсанд Ваисов Элликқалъадаги ихтисослаштирилган санъат мактабида прима рубоби синфида таълим бериб, бир қатор ютуқларга эришиб келаётган бўлса, Ў.Жуманиёзов Қорақалпоғистон ва Ўзбекистон саҳналарида намойиш этган кўплаб концертлари, танловларда муваффақиятли чиқишлари билан мусиқа шинавандалари кўнглидан жой олди. Ҳозирги кунда у Ўзбекистон давлат консерваториясининг Нукус филиали прима рубоби синфида дарс бериб келмоқда.

Комилжон Муротовнинг болалар мусиқа ва санъат мактаби ўқувчилари билан ишлаш услуби жуда ибратли. Унинг ўқувчилар психологиясидан келиб чиқиб, тўғри ижро дастурини танлаш, кўрик-танловларга тайёрлаш каби муҳим вазифаларни юксак маҳорат билан бажариши кўпчиликка намуна бўла олади. 

Ўктам Жуманиёзов,

21-сонли Болалар мусиқа ва санъат мактаби ўқитувчиси.