3-сектор фаолиятига бир назар

Сўнгги йилларда мамлакатимизда ҳудудларни комплекс ижтимоий-иқтисодий ривожлантириш, аҳолининг яшаш шароитларини тубдан яхшилаш, турмуш даражасида сезиларли ижобий ўзгаришларга эришиш бўйича изчил чора-тадбирлар амалга оширилмоқда. Ушбу мақсадда ҳудудларни секторларга бўлиб ишни ташкил этиш тизимининг жорий этилганлиги халқ билан манзилли мулоқотнинг йўлга қўйилишига имкон яратди.

Ҳокимлик, прокуратура, ички ишлар ва солиқ хизмати органлари раҳбарлари бошчилик қилаётган секторлар ўз ҳудудларида барча ижтимоий-иқтисодий соҳадаги муаммоларни ҳал этиш билан бир қаторда, ҳуқуқбузарликлар профилактикаси, қонунийликни мустаҳкамлаш ва ҳуқуқ-тартиботни таъминлаш бўйича зарур чора-тадбирларни амалга оширмоқдалар.       

Хусусан, Амударё тумани Ички ишлар бўлими бошлиғи Жамаладдин Юсупов раҳбарлик қилаётган 3-сектор ҳудудида ҳам айни вазифалалар устувор мақсадлардан бирига айланган бўлиб, бу борада олиб борилаётган амалий ишлар ўзининг ижобий натижасини кўрсатиб келмоқда.

Маълумот тариқасида Амударё тумани 3-сектор ҳудудида 12 та шаҳарча, овул ва маҳаллалар мавжуд бўлиб унда яшовчи ахоли сони 54 минг 105 кишини ташкил қилади.

Ўтган йили маҳаллаларда иш бошлаган ҳоким ёрдамчилари аҳоли бандлигини таъминлаш ва камбағалликни қисқартириш бўйича сектор раҳбарининг яқин кўмакчиси ва маслаҳатдошига айланган. Сектор ҳудудидаги маҳаллаларни ижтимоий-иқтисодий ривожлантириш, инфратузилмасини яхшилаш, инвестицион жозибадорлигини ошириш бўйича сектор масъуллари ва ҳоким ёрдамчилари ҳамкорлигида амалга оширилаётган ишлар алоҳида эътирофга лойиқ.

Сектор ҳудудидаги Бойовул маҳалласининг Тадбиркорлар кўчасида истиқомат қилувчи Ойбек Ўразимбетов шу йилнинг май ойида 33 млн.сўм имтиёзли кредит олиб “Yo'ldosh stom” клникасини очди. Бу клиникада аҳолига сифатли стоматология хизматлари кўрсатилиб, беморлар учун барча қулайликлар яратилган. Айтиш лозимки, жорий йилнинг 6 ойи мобайида оилавий тадбиркорликни ривожлантириш мақсадида хоким ёрдамчилари томонидан 357 нафар фуқарога 2,5 млрд.сўмлик кредит маблағлағи ажратилган. Бундан ташқари, доимий даромадга эга, қўшимча даромад топиш истаги бор 366 нафар фуқаронинг 64 нафарига енгил конструкцияли иссиқхона хамда асбоб-ускуналар сотиб олишлари учун 48,9 млн.сўмлик субсидиялар ажратилган.

Сектор ҳудудида жойлашган Дурунки маҳалласида ҳам бошқа маҳаллалар каби аҳолини ҳар томонлама қўллаб-қувватлашга, бандлигини таъминлашга алоҳида аҳамият берилмоқда. Маҳаллада истиқомат қилувчи Мансур Ҳайитжанов ҳам ҳоким ёрдамчиси кўмаги билан 33 млн.сўм миқдорида имтиёзли кредит олиб, Хитой Халқ Республикасидан келтирилган мини комбайнларни харид қилди. Ушбу комбайнлар ёрдамида оиласига қўшимча даромад олиб кириш билан бирга маҳалладошларининг оғирини енгил қилиб, буғдой ва шолиларини ўриб-йиғиб олишга ёрдам бериб келмоқда.

Дурунки маҳалласида ёшовчи яна бир бандлиги таъминланган тадбиркор аёллардан бири Муяссар Ваисовадир. Ўз маҳалладошларини сифатли ва арзон биогумус билан таъминлаб келмоқда.

Дурунки маҳалласида тадбиркорлар сонининг тобора ошиб бориши ишсиз фуқароларнинг бандлиги таъминланишида, оилавий даромадлари ошиши ва иқтисодиётимиз ривожланишида муҳим аҳамиятга эга бўлмоқда.

225 млн.сўм миқдорида имтиёзли кредит олиб, мебель ишлаб чиқаришга ихтисослашган “Явкашев Жасур” масъулияти чекланган жамияти фаолиятини янада ривожлантираётган тадбиркор Жасурбек Явкашев ҳам 4 нафар ишсиз ёшларнинг бандлиги таъминланишига хисса қўшди. Бугунги кунда ушбу мебель ишлаб чиқарилувчи цехда замонавий русумдаги ошхона ва мехмонхона мебеллари сифатли ва арзон нархларда ишлаб чиқарилмоқда.

Шунингдек, сектор ҳудудида истиқомат қилувчи ижтимоий ҳимояга муҳтож фуқароларга ҳам сектор масъуллари томонидан турли ёрдамлар кўрсатилиб келинмоқда.

“Темир дафтар” рўйхатидаги оилаларга озиқ-овқат, дори-дармон воситалари тарқатиш, уйларини таъмирлаб бериш, боқувчиси йўқ якка-ю ёлғиз аёлларга янгидан уй қуриб бериш ишлари ҳукуматимизнинг тегишли фармон ва қарорлари асосида олиб борилмоқда.

Шунингдек, сектор ҳудудидаги маҳаллаларни янада ободонлаштириш, ички йўлларни таъмирлаш, йўл-транспорт ҳодисалари, ҳуқуқбузарликларнинг олидини олиш борасида ҳам изчил саъй-ҳаракатлар амалга оширилмоқда.

Биз эса халқ форовонлиги ва розилиги йўлида тиним билмасдан меҳнат қилаётган сектор раҳбари ва масъулларининг иш фаолиятига муваффақиятлар тилаймиз.

Туман ҳокимлигининг Ахборот хизмати.