ФИДОЙИ МЕҲНАТЛАР ЭЪТИРОФИ
Журналистикани шунчаки касб тури, дея баҳолаш камлик қилади. Чунки аввало худо берган қобилияти, уни юзага чиқариши учун интилиши бўлмаган, доимо ўқиб-ўрганиб, ўз устида қунт билан шуғулланмаган одам журналист бўлолмайди, эл эътиборини қозона олмайди.
Бизга олийгоҳда таълим берган устозларимиз "журналист ҳаётдан бир қадам олдинда бормоғи керак”, дея уқтиришарди. Бу сўзнинг замиридаги олам-олам маънони мен "Амударё ҳақиқати” газетасида ишлаган 1979-1995 йилларда янада чуқур англаб етдим. Газетадаги ҳар бир мақола, жумла, сўз журналистга нечоғлик улкан масъулият юклашини ҳам ўша йилларда англадим.
Ҳозир "Тараққиёт кўзгуси” номи билан чоп этилаётган газета таҳририятида ўзига хос ижодий ва дўстона муҳит барқарорлигидан, журналистларнинг иқтидорли, меҳнатсеварлигидан газетамиз доим турли танловларда ғолиб бўлиб, республикамизда намунали нашр саналиб келинган.
Мен қарийб 20 йилча вақтдан бери бошқа лавозимларда ишлаётган бўлсам ҳам кўнглим доимо газета билан. Унинг ҳар бир янги сонини, туманимиз ҳаётига оид хушхабарларни орзиқиб кутаман. Ва шу баробарида ҳали сиёҳи қуриб улгурмаган газета саҳифаларини тайёрлаш учун таҳририятдаги ҳамкасбларим, шогирдларим қилган меҳнатлари залворини ҳис қиламан.
Кейинги йилларда бутун туманимиз аҳли таҳририят ходимларининг ижодий изланишлари ва салоҳияти меваси бўлмиш газетанинг адади ошаётгани, мазмунан янги қиёфа касб этаётгани, илова нашри ташкил этилганини, қисқаси, газетанинг нуфузи ортиб бораётганини қувониб кузатмоқда.
Яқинда оммавий ахборот воситалари учун таъсис этилган "Эътироф” республика танловида "Тараққиёт кўзгуси” газетаси Ўзбекистоннинг энг яхши ҳудудий газетаси, деб тан олинганини эшитиб, қувонганимдан ўзимни қўярга жой тополмай қолдим. Негаки, Ўзбекистон матбуот ва ахборот агентлиги, Ўзбекистон мустақил босма оммавий ахборот воситаларини ва ахборот агентликларини қўллаб-қувватлаш ва ривожлантириш жамоат фонди, Ўзбекистон журналистлари ижодий уюшмаси ҳамкорликда ташкил этган танловга тақдим этилган 3 мингдан зиёд ҳужжатлар ичида ғолиб бўлишнинг ўзи бўлмайди. Бу бош муҳаррирнинг янгиликка интилувчанлиги, талабчанлиги, давр руҳига монанд меҳнат қилаётгани, журналистларнинг юксак ижодий салоҳияти самарасидир. Меҳнатлари "Эътироф”да эътироф этилган газета ижодкорларига бундан-да юксак парвозлар тилайман.
Хонимжон РАЖАБОВА, Қорқалпоғистонда
хизмат кўрсатган маданият ходими, журналист.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
