FIDOYI MEHNATLAR EʼTIROFI
Jurnalistikani shunchaki kasb turi, deya baholash kamlik qiladi. Chunki avvalo xudo bergan qobiliyati, uni yuzaga chiqarishi uchun intilishi boʻlmagan, doimo oʻqib-oʻrganib, oʻz ustida qunt bilan shugʻullanmagan odam jurnalist boʻlolmaydi, el eʼtiborini qozona olmaydi.
Bizga oliygohda taʼlim bergan ustozlarimiz "jurnalist hayotdan bir qadam oldinda bormogʻi kerak”, deya uqtirishardi. Bu soʻzning zamiridagi olam-olam maʼnoni men "Amudaryo haqiqati” gazetasida ishlagan 1979-1995-yillarda yanada chuqur anglab yetdim. Gazetadagi har bir maqola, jumla, soʻz jurnalistga nechogʻlik ulkan masʼuliyat yuklashini ham oʻsha yillarda angladim.
Hozir "Taraqqiyot koʻzgusi” nomi bilan chop etilayotgan gazeta tahririyatida oʻziga xos ijodiy va doʻstona muhit barqarorligidan, jurnalistlarning iqtidorli, mehnatsevarligidan gazetamiz doim turli tanlovlarda gʻolib boʻlib, respublikamizda namunali nashr sanalib kelingan.
Men qariyb 20-yilcha vaqtdan beri boshqa lavozimlarda ishlayotgan boʻlsam ham koʻnglim doimo gazeta bilan. Uning har bir yangi sonini, tumanimiz hayotiga oid xushxabarlarni orziqib kutaman. Va shu barobarida hali siyohi qurib ulgurmagan gazeta sahifalarini tayyorlash uchun tahririyatdagi hamkasblarim, shogirdlarim qilgan mehnatlari zalvorini his qilaman.
Keyingi yillarda butun tumanimiz ahli tahririyat xodimlarining ijodiy izlanishlari va salohiyati mevasi boʻlmish gazetaning adadi oshayotgani, mazmunan yangi qiyofa kasb etayotgani, ilova nashri tashkil etilganini, qisqasi, gazetaning nufuzi ortib borayotganini quvonib kuzatmoqda.
Yaqinda ommaviy axborot vositalari uchun taʼsis etilgan "Eʼtirof” respublika tanlovida "Taraqqiyot koʻzgusi” gazetasi Oʻzbekistonning eng yaxshi hududiy gazetasi, deb tan olinganini eshitib, quvonganimdan oʻzimni qoʻyarga joy topolmay qoldim. Negaki, Oʻzbekiston matbuot va axborot agentligi, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Oʻzbekiston jurnalistlari ijodiy uyushmasi hamkorlikda tashkil etgan tanlovga taqdim etilgan 3 mingdan ziyod hujjatlar ichida gʻolib boʻlishning oʻzi boʻlmaydi. Bu bosh muharrirning yangilikka intiluvchanligi, talabchanligi, davr ruhiga monand mehnat qilayotgani, jurnalistlarning yuksak ijodiy salohiyati samarasidir. Mehnatlari "Eʼtirof”da eʼtirof etilgan gazeta ijodkorlariga bundan-da yuksak parvozlar tilayman.
Xonimjon RAJABOVA, Qorqalpogʻistonda
xizmat koʻrsatgan madaniyat xodimi, jurnalist.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
