Бюджетдан ташқари Пенсия жамғармаси масъулларининг сайёр қабули бўлиб ўтди

Аҳолининг муаммоларини ўрганиш, аниқлаш ва уларни бартараф этишда жойларда ташкил этиладиган сайёр қабуллар алоҳида аҳамият касб этади. Республикамиз ҳудудларида ушбу йўналишда алоҳида тизим яратилгани энг долзарб бўлган муаммоларнинг ечилишида муҳим омил бўлаётир.  

2023 йил 18 октябрь куни Амударё туманининг Бойовул маҳалласида ҳудудидаги 9-сонли Болалар мусиқа ва санъат мактаби биносида бюджетдан ташқари Пенсия жамғармаси ижро этувчи директорининг биринчи ўринбосари Зоҳидхўжа Турсунов томонидан фуқаролар учун сайёр қабул ўтказилди. Унда туман ҳокимининг ўринбосари – инвестициялар ва ташқи савдо бўлими бошлиғи Фахриддин Юсупов, бошқарма бошлиғи Азамат Убайдуллаевлар иштирок этишдилар.

Сайёр қабулда қайд этилганидек, мамлакатимизда инсон манфаатлари олий қадрият даражасига кўтарилган. Бугун барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим асосида иш олиб борилмоқда. Жойларда ўтаётган сайёр қабуллар халқнинг дардини эшитиш, уларнинг муаммоларини ҳал этишда, шак-шубҳасиз, кутилган натижаларни бермоқда. Зеро, давлатимиз раҳбари таъкидлаганидек, халқ давлат органларига эмас, балки давлат органлари халқимизга хизмат қилиши керак.

Таъкидлаш жоизки, халқ билан фаол ва очиқ мулоқот олиб бориш йўлида ташкил қилинаётган бундай сайёр қабуллар аввало инсоннинг ҳуқуқ ҳамда манфаатларини таъминлаш, қолаверса, халқимизнинг фаровон, бахтли ҳаёт кечириши учун шароит яратиш сари қўйилган муҳим қадам бўлмоқда.

Бюджетдан ташқари Пенсия жамғармаси маъмурияти томонидан Республикамиз бўйлаб ўтказилаётган сайёр қабуллар жараёнида аҳолининг муаммолари ўрганилиб, кўплаб ижобий натижаларга эришилмоқда.

Бу галги сайёр қабулдан кўзланган мақсад ҳам туманда яшовчи фуқароларнинг соҳага доир муаммоларини ўрганиш, ижобий ҳал этилишига кўмаклашиш, таклиф ҳамда тавсияларини тинглашдан иборат бўлди.

Бюджетдан ташқари Пенсия жамғармаси туман бўлими томонидан ташкил этилган мазкур сайёр қабулда овул ва маҳаллалардан ташриф буюрган фуқаролар, айниқса, нафақа ёшидаги отахон ва онахонлар иштирок этдилар. Ўтказилган мазкур тадбирда фуқаролар ўз муаммолари хусусида масъулларга мурожаат этдилар.

Қабул давомида масъулларга фуқаролар томонидан 15та мурожаатлар келиб тушди. Бюджетдан ташқари Пенсия жамғармаси ижро этувчи директорининг биринчи ўринбосари Зоҳидхўжа Турсунов ва бошқа мутасаддилар томонидан аҳолида келиб тушаётган мурожаатлар тингланиб, фуқаролар билан тушунтириш ишлари олиб борилди. Шунингдек қонунчиликдаги ўзгаришлар, янгиликлар ҳамда яратилиб берилаётган имтиёзлар, қулайликлар тўғрисида йиғилганларга батафсил тушунчалар берилди.

Жамғарманинг Қорақалпоғистон Республикаси бошқармаси бошлиғи Азамат Убайдуллаев ҳар бир мурожаатчи билан очиқ мулоқотда бўлиб, мурожаатларда баён этилган муаммоларни бартараф этиш чоралари тўғрисида батафсил айтиб ўтди.

Жойларда ташкил қилинаётган бу каби сайёр қабуллар натижасида ҳукумат идоралари ва халқ ўртасидаги кўринмас девор олиб ташланиб, ёрдамга муҳтож фуқаролар ўз муаммоларини мутасадди ташкилот раҳбарларига тўсиқсиз етказишмоқда. Бу орқали эса кўплаб муаммолар жойида ҳал қилиниб, халқ ва давлат ягона бир мақсад – Ватан тараққиёти йўлида ҳамжиҳатликда ҳаракат қилаётир.

Туман ҳокимлиги Ахборот хизмати