Қомусий бахт

Бу рангин дунёда неча Ватан бор,
Неча минг миллат бор, неча элат бор.
Билганим шу эрур, меҳр устувор
Ва тинчлик устувор, тенглик устувор –
Ўзбекистон – ота маконим менинг!

Сиёсат бобида бағри кенг Ватан –
Бир юз қирқ миллатга онадур бекам.
Саҳро-ю тоғлари – бебаҳо маъдан,
Маъданлари билан кўнгли тўқ, бирдам –
Тотувликка пойдор арконим менинг!

Ҳар инсон бахтга ёр яшашга ҳақли,
Оилалар бағри ободон, тахтли.
Тараққиёт сари қўйилган шаҳдли
Қадамлар залворли, дадил қудратли –
Келажакка кафил имконим менинг!

Олий Қонун бунда ўқийди ҳукм:
Эл-у халқ соғлиги баридан муҳим.
Барчага насибдур сифатли таълим,
Эъзозга мушарраф мактаб, муаллим –
Тенгсиз дорилфунун – ирфоним менинг!

Дин-у эътиқодда чексиз ҳимоя.
Инсон қадри баланд ҳар саҳфасида,
Орзулар, умидлар топмас ниҳоя,
Бахт-у саодатга кафил миссия –
Конституция – қўрғоним менинг!
Шу қўрғон бор учун Ватан осуда,
Эл-у халқ бахтга ёр, ҳар дам осуда.
Ер-у осмонида, қир-у тоғида
Уйғун тараққиёт ҳар бир онида –
Мангуга гул очган армоним менинг!

Боқдим тўрт тарафга – ажиб ўзгариш,
Истиқболга монанд, ҳамоҳанг ҳар иш.
Авлодлар улғаяр, яшар беташвиш,
Янги Ўзбекистон – янги эврилиш –
Дунё нигоҳида давроним менинг!

Бир юз эллик бешта модда мазмуни,
Моҳияти билан ўтгувчи кунни.
Яшнатиб табаррук она Заминни,
Қирқ миллионли азиз кўрғон – Ватанни,
Юракларга эккан ўроним менинг!

Сўз айтсам, сўзларим минг хил жилвали,
Боқсам, дарёларим жўшқин жилғали.
Келар жумла жаҳон бир бор кўргали,
Оби кавсарларим сеҳрин туйгали –
Тинчлик туғин тутган ошёним менинг!

Қомусий салтанат – тахтимга шукур,
Зиёбахш онларим – бахтимга шукур.
Яшамоқ, яратмоқ – аҳдимга шукур,
Робия, дил тўла шаҳдимга шукур,
Бағри кенг жонажон маконим менинг!

Робия ЙЎЛДОШЕВА.