Qomusiy baxt

Bu rangin dunyoda necha Vatan bor,
Necha ming millat bor, necha elat bor.
Bilganim shu erur, mehr ustuvor
Va tinchlik ustuvor, tenglik ustuvor –
Oʻzbekiston – ota makonim mening!

Siyosat bobida bagʻri keng Vatan –
Bir yuz qirq millatga onadur bekam.
Sahro-yu togʻlari – bebaho maʼdan,
Maʼdanlari bilan koʻngli toʻq, birdam –
Totuvlikka poydor arkonim mening!

Har inson baxtga yor yashashga haqli,
Oilalar bagʻri obodon, taxtli.
Taraqqiyot sari qoʻyilgan shahdli
Qadamlar zalvorli, dadil qudratli –
Kelajakka kafil imkonim mening!

Oliy Qonun bunda oʻqiydi hukm:
El-u xalq sogʻligi baridan muhim.
Barchaga nasibdur sifatli taʼlim,
Eʼzozga musharraf maktab, muallim –
Tengsiz dorilfunun – irfonim mening!

Din-u eʼtiqodda cheksiz himoya.
Inson qadri baland har sahfasida,
Orzular, umidlar topmas nihoya,
Baxt-u saodatga kafil missiya –
Konstitutsiya – qoʻrgʻonim mening!
Shu qoʻrgʻon bor uchun Vatan osuda,
El-u xalq baxtga yor, har dam osuda.
Yer-u osmonida, qir-u togʻida
Uygʻun taraqqiyot har bir onida –
Manguga gul ochgan armonim mening!

Boqdim toʻrt tarafga – ajib oʻzgarish,
Istiqbolga monand, hamohang har ish.
Avlodlar ulgʻayar, yashar betashvish,
Yangi Oʻzbekiston – yangi evrilish –
Dunyo nigohida davronim mening!

Bir yuz ellik beshta modda mazmuni,
Mohiyati bilan oʻtguvchi kunni.
Yashnatib tabarruk ona Zaminni,
Qirq millionli aziz koʻrgʻon – Vatanni,
Yuraklarga ekkan oʻronim mening!

Soʻz aytsam, soʻzlarim ming xil jilvali,
Boqsam, daryolarim joʻshqin jilgʻali.
Kelar jumla jahon bir bor koʻrgali,
Obi kavsarlarim sehrin tuygali –
Tinchlik tugʻin tutgan oshyonim mening!

Qomusiy saltanat – taxtimga shukur,
Ziyobaxsh onlarim – baxtimga shukur.
Yashamoq, yaratmoq – ahdimga shukur,
Robiya, dil toʻla shahdimga shukur,
Bagʻri keng jonajon makonim mening!

Robiya YOʻLDOShEVA.