1-СОНЛИ МАКТАБДА “АССАЛОМ, ЯНГИ ЙИЛ!” ДЕБ НОМЛАНГАН БАЙРАМ ТАДБИРИ ЎТКАЗИЛДИ

Вақт югурик, шиддатли. Ҳадемай 2023 йил ҳам тарихга айланади. Ўтаётган ҳар дақиқалар бизни янги – 2024 йилга яқинлаштирмоқда.

Янги йил шукуҳи боис якунланаётган йил умримизнинг бир бўлагини олиб кетаётганини ҳам ҳис қилмаймиз. Боиси бу байрамни барчамиз интиқлик билан кутамиз. Мазкур байрам болалигимиздан мўъжизалар олиб келувчи, янги қувончлар, орзуларга етаклайдиган кун сифатида хотирамизда қолган.

Байрам арафасида Манғит шаҳридаги 1-сонли мактабда ўтказилган “Ассалом, Янги йил” деб номланган байрам тадбири ҳам ўқувчиларни чексиз шодликларга белади.

Мактаб фаоллар залида бўлиб ўтган тадбирга мактаб директори, ўринбосарлари, ўқитувчилар, ўқувчилар, ота-оналар вакиллари иштирок этдилар.

Тадбирни мактаб директори Дилрабо Шербоева очди ва барчани яқинлашиб келаётган байрам билан қутлади. Шунингдек, мактаб бадиий ҳаваскорлари ижросида инглиз тили фани ўқитувчилари раҳбарлигида тайёрланган мусиқий–маданий тадбирни томоша қилишга таклиф этди.

Байрамона безатилган мактаб фаоллар залига йиғилганлар маҳобатли арча олдига чиқиб келган уч нафар бошловчи ўқувчиларни қарсаклар билан кутиб олдилар. Улар аввало барчани она тилимизда ҳамда рус, инглиз тилларида янги йил билан қутладилар. Шунингдек, янги йил байрамининг келиб чиқиш тарихи, турли мамлакатларда турлича нишонланиши ҳақида батафсил маълумотлар бериб ўтдилар.

Таъкидланганидек, Янги йил турли мамлакатларда, турли саналарда, турли тарзда нишонланади. Хусусан, Италияда бу байрам 6 январдан бошланади ва анъанага кўра, шу куни барча эски нарсалар деразадан кўчага улоқтирилади. Колумбияда мазкур байрам масхарабоз-у эртаклар қаҳрамонлари иштирокидаги карнавал билан бошланади. Папа Паскуал (Қорбобо) шаҳар бўйлаб сайр қилиб, барчани байрам билан қутлайди. Японияда эса Янги йилда яқинларга совға сифатида белкурак тақдим этилади. Болалар эса албатта, янги кийим кийишади.

Ҳа, Янги йилни нишонлаш билан боғлиқ урф-одатлар, анъаналар турлича. Лекин бутун оила жам бўлиб, тўкин дастурхон атрофида, бир-бировга энг яхши тилакларни изҳор этиб, янги йилни нишонлашга ҳеч нарса тенг келмайди. Байрам муносабати билан умумтаълим, мактабларида ўтказиладиган тадбирлар, Қорбобо, Қорқиз ташрифи, шодон ўйин кулгулар болажонларга ўчмас таассуротлар ҳадя этади.

Ҳа, бу “Ассалом, Янги йил” деб номланган тадбирда ҳам яққол намоён бўлди. Мактаб ўқувчиларининг тайёрлаган махсус мусиқий дастуридан ўрин олган ҳар бир қўшиқ, рақс, ифодали ўқилган шеърлар томошабинларга жуда манзур бўлди. Айниқса ўқувчилар чорлови билан кириб келган Қорбобо ва Қорқиз ташрифи ўқувчилар шодлигига шодлик қўшди, улар билан жўровоз бўлиб куйланган шеърлар, қўшиқ, рақслар авжи жуда баланд бўлди. Шунингдек, ўзбек адабиётининг таниқли вакили Саид Аҳмад асари асосида тайёрланган саҳна кўриниши ўқувчиларнинг ижодий қобилиятини ҳам юзага чиқарди.

Тадбир барчада улкан таассуротлар қолдирди.

Ойгул РАЖАБОВА.