Ипак қурти боқиш ва пилла етиштириш мавсуми уюшқоқликда ўтказилмоқда
Ипак қурти боқиш ва пиллачилик Ўзбекистоннинг бой маданий меросининг ажралмас қисмидир. Ушбу соҳа кўп асрлик тарихга эга. Ипак қурти етиштириш ва боқишнинг тарихи милоддан аввалги II асрга бориб тақалади. Ипак Буюк Ипак йўли орқали Шарқ ва Ғарбни боғлаган савдо йўлларида муҳим ҳамда қимматбаҳо маҳсулот вазифасини ўтаган.
Бу соҳа мамлакат иқтисодиётида ҳам катта аҳамият касб этади. Шу сабабли ҳам мамлакатимизда пиллачиликни ривожлантиришга давлат томонидан катта эътибор қаратилмоқда. Пиллани қайта ишлаш соҳасида кўплаб янгиликлар жорий этилиб, бу ўз навбатида маҳсулотларнинг халқаро бозорларда рақобатбардошлигини оширишга хизмат қилмоқда. Шу билан бирга Ўзбекистонда ипакчилик соҳасида илмий-тадқиқот ишлари ва инновацион ёндашувлар ҳам фаоллаштирилмоқда, бу эса мамлакатнинг ипакчилик саноатини янада ривожлантиришга ёрдам беради. Мазкур соҳада давлат томонидан берилаётган субсидиялар ва солиқ имтиёзлари, шунингдек, илмий-тадқиқот ишларига ажратилаётган маблағлар ипакчиликни янада ривожлантириш учун муҳим омил ҳисобланади. Буларнинг барчаси Ўзбекистоннинг ипакчилик саноатини янги босқичга кўтаришга ва унинг жаҳон бозоридаги ўрнини мустаҳкамлашга хизмат қилади.
Амударё туманида ҳам ипак қуртини боқиш ва пилла етиштиришга катта эътибор қаратилади. Туманда ҳар йили Қорақалпоғистон бўйича карвони энг оғир ва салмоқли бўлган пилла хирмони бунёд этилади. Амударёлик пиллакорлар бу йилги мавсумни ҳам уюшқоқлик билан ўтказмоқдалар. Ҳар йили пиллачилик билан шуғулланиб, даромад топаётган оилалар бу йил ҳам ипак қурти қутиларини олиб, парваришлашни аллақачон бошлаб юбордилар.
Пиллачилик соҳасида асосан қишлоқ аёл-қизлари мавсумий иш билан банд бўлишади. Шу сабабли туман ҳокими ўринбосари, Оила ва хотин-қизлар бўлими бошлиғи Гўзал Сабурова пиллакор хотин-қизлар ҳолидан хабар олиб, ипак қуртини парваришлаш жараёни билан яқиндан танишиб, бу борада юзага келаётган муаммоларни тегишли масъуллар иштирокида тезкор бартараф қилиш чорларини кўриб келмоқда.
Ипак қурти парваришининг ҳам ўзига хос машаққати ва сир-асрорлари бор. Энг аввало уруғларнинг сифати ва парвариш шароитлари маҳсулотнинг, яъни олинадиган пилланинг сифатига таъсир кўрсатади. Ипак барча даврларда ҳам харидоргир маҳсулот бўлиб келган. Шу сабабли ҳам Республикамизда сифатли пилла хом ашёси етиштириш, етиштирилган пилладан жаҳон стандарти талабларига жавоб берадиган юқори сифатли хом ипак олиш, ипакли маҳсулотлар сифатини яхшилаш ва ассортимент турларини кенгайтириш, таннархини камайтириш, маҳсулот сифатига салбий таъсир кўрсатувчи омилларни аниқлаш ва уларни бартараф қилишга алоҳида эътибор қаратилмоқда.
Бу ҳаракатларнинг қанчалик самарали бўлиши энг аввало ипак қурти боқувчи пиллакорларга боғлиқ. Буни тўғри англаб етган пиллакорлар ўз ишларини сидқидилдан бажариб, ипакчилик тармоғининг ривожига ўз ҳиссаларини қўшмоқдалар. Ушбу тармоқнинг ривожланиши келгусида пиллакорларнинг даромад манбаини янада оширибгина қолмай, етиштирилган пилла миқдорининг кўпайишига, ундан олинадиган хом ипак, ипакли маҳсулотлар миқдорининг ортишига ҳамда хорижий давлатларга экспорт қилиш ҳажмининг кўпайишига шароит яратади. Бу эса ўз навбатида Республикамиз иқтисодиётининг ривожланишига ҳамда аҳоли турмушининг янада фаровон бўлишига таъсир кўрсатади.
Амударё тумани ҳокимининг ўринбосари, Оила ва хотин-қизлар бўлими бошлиғи Гўзал Сабурова пиллакор хотин-қизларга уларнинг меҳнатлари қанчалик муҳим иқтисодий ва ижтимоий аҳамиятга эга эканлигини тушунтириш билан бирга пиллачилик тармоғини янада ривожлантириш, касаначиларнинг моддий манфаатдорлигини ошириш борасида мамлакатимизда амалга оширилаётган ислоҳотлар ҳақида маълумотлар бермоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
